ବିଜୟ ମହାନ୍ତି

ବିଜୟ ମହାନ୍ତି (୧୯୫୦ ଅପ୍ରେଲ ୮ - ୨୦୨୦ ଜୁଲାଇ ୨୦) ଜଣେ ଓଡ଼ିଆ ଅଭିନେତା, ନିର୍ଦ୍ଦେଶକ ଓ ନାଟ୍ୟକାର ଥିଲେ । ସେ ଚରିତ୍ର ଅଭିନେତାଠାରୁ ଆରମ୍ଭ କରି ହାସ୍ୟ ଅଭିନେତା, ଖଳନାୟକ, ନାୟକ ଆଦି ବିଭିନ୍ନ ଭୂମିକାରେ ଅଭିନୟ କରିଥିଲେ । ୧୯୭୭ ମସିହାରେ ବିଜୟ ମହାନ୍ତି ଚିଲିକା ତୀରେ ଚଳଚ୍ଚିତ୍ର ଜରିଆରେ ଅଭିନୟ ଜୀବନ ପ୍ରାରମ୍ଭ କରିଥିଲେ । ଏହି ଚଳଚ୍ଚିତ୍ରଟିକୁ ରାଷ୍ଟ୍ରୀୟ ଚଳଚ୍ଚିତ୍ର ପୁରସ୍କାର ମିଳିଥିଲା । ୨୦୧୪ ମସିହା ଲୋକ ସଭା ନିର୍ବାଚନରେ ସେ ଭୁବନେଶ୍ୱର ଲୋକ ସଭା ନିର୍ବାଚନ ମଣ୍ଡଳୀରୁ କଂଗ୍ରେସ ଟିକେଟରେ ନିର୍ବାଚନ ମଧ୍ୟ ଲଢ଼ିଥିଲେ ।

ବିଜୟ ମହାନ୍ତି
ସହରୀ ବାଘ ଚଳଚ୍ଚିତ୍ରର ସୁଟିଂ ସେଟ୍‌ରେ ବିଜୟ ମାହନ୍ତି
ଜନ୍ମ	(1950-04-08)୮ ଅପ୍ରେଲ ୧୯୫୦ କେନ୍ଦ୍ରାପଡ଼ା
ମୃତ୍ୟୁ	୨୦ ଜୁଲାଇ ୨୦୨୦(2020-07-20) (ବୟସ ୭୦) ଭୁବନେଶ୍ୱର
ମୃତ୍ୟୁର କାରଣ	ଶାରୀରିକ ଅସୁସ୍ଥତା
ଶିକ୍ଷାନୁଷ୍ଠାନ	ରାଷ୍ଟ୍ରୀୟ ନାଟ୍ୟ ବିଦ୍ୟାଳୟ (୧୯୭୩)
ବୃତ୍ତି	ଅଭିନେତା
ସକ୍ରିୟ ବର୍ଷ	୧୯୭୭-୨୦୨୦
ବୈବାହିକ-ସାଥୀ	ତନ୍ଦ୍ରା ରାୟ
ପିତାମାତା	ଆଦିକନ୍ଦ ମହାନ୍ତି ଶାନ୍ତିଲତା ମହାନ୍ତି
ସମ୍ପର୍କୀୟ	ଅଜୟ ମହାନ୍ତି (ଭାଇ)
ପୁରସ୍କାର	ଜୟଦେବ ପୁରସ୍କାର, ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର (ନାଟକ ଏକାଙ୍କିକା)
ୱେବସାଇଟ	www.bijaymohanty.com

ବାଲ୍ୟଜୀବନ ଓ ଶିକ୍ଷା

ବିଜୟ ମହାନ୍ତି ୧୯୫୦ ମସିହା ଅପ୍ରେଲ ୮ତାରିଖରେ କେନ୍ଦ୍ରାପଡ଼ା ଜିଲ୍ଲାର ପାଣ୍ଡିରି ଗ୍ରାମରେ ଜନ୍ମ ନେଇଥିଲେ । ତାଙ୍କ ପିତାଙ୍କ ନାମ ଆଦିକନ୍ଦ ମହାନ୍ତି ଓ ମାତାଙ୍କ ନାମ ଶାନ୍ତିଲତା ମହାନ୍ତି । ସେମାନେ ୨ ଭାଇ ଓ ୩ ଭଉଣୀ ଥିଲେ । ବିଜୟ ସେମାନଙ୍କ ମଧ୍ୟରେ ବଡ଼ ଥିଲେ । ପିତା ଆଦିକନ୍ଦ ବାରିପଦାରେ ସରକାରୀ ବସରେ କଣ୍ଡକ୍ତର ଚାକିରି କରୁଥିଲେ । ବିଜୟଙ୍କ ଶିକ୍ଷାରମ୍ଭ ସେହିଠାରେ ହୋଇଥିଲା । ମହାରାଜା କୃଷ୍ଣଚନ୍ଦ୍ର ବିଦ୍ୟାଳୟରେ ଦଶମ ଶ୍ରେଣୀରେ ପଢ଼ିଲା ବେଳକୁ, ସ୍କୁଲ ବାର୍ଷିକ ଉତ୍ସବରେ ସେ ପ୍ରଥମ ଥର ଅଭିନୟ କରିଥିଲେ । ମାଟ୍ରିକ ପାସ କଲା ପରେ, ସେ ରାଜ୍ୟ ପରିବହନ ବିଭାଗରେ ଚାକିରି କରିଥିଲେ । ଚାକିରି ସହିତ ମହାରାଜା ପୂର୍ଣ୍ଣଚନ୍ଦ୍ର ମହାବିଦ୍ୟାଳୟରେ ପାଠ ମଧ୍ୟ ପଢୁଥିଲେ । କଲେଜର ପ୍ରଥମ ବର୍ଷରେ କଲେଜ ନାଟକରେ ଅଭିନୟ କରି, ସେ ଶ୍ରେଷ୍ଠ ଅଭିନେତା ପୁରସ୍କାର ଲାଭ କରିଥିଲେ । କ୍ରମାଗତ ଭାବରେ ନାଟକ ଅଭିନୟ କରି କରି, ସେ ସଫଳତା ପାଇଥିଲେ । ସାଙ୍ଗମାନଙ୍କୁ ନେଇ "ଯୁଗେଚ୍ଛା ନାଟ୍ୟ ସଂସ୍ଥା" ନାମକ ଅନୁଷ୍ଠାନ ଗଢ଼ି ଅଧିକ ନାଟକ ମଞ୍ଚସ୍ଥ କରିଥିଲେ । ଅଭିନୟ କ୍ଷେତ୍ର ଆଗକୁ ବଢିବା ନିମନ୍ତେ, ରାଷ୍ଟ୍ରୀୟ ନାଟ୍ୟ ବିଦ୍ୟାଳୟ, ଦିଲ୍ଲୀରେ ନାମ ଲେଖାଇଥିଲେ । ସେଠାରେ ସେ ଜାତୀୟ ମେଧା ବୃତ୍ତି ଲାଭ କରିଥିଲେ ।

କଥାଚିତ୍ର ଜୀବନ

ରାଷ୍ଟ୍ରୀୟ ନାଟ୍ୟ ବିଦ୍ୟାଳୟ, ନୂଆଦିଲ୍ଲୀରୁ (୧୯୭୩ ବ୍ୟାଚ) ଶିକ୍ଷା ସମାପ୍ତ କରି ବିଜୟ ମହାନ୍ତି, ୧୯୭୭ ମସିହାରେ ସେ ଚିଲିକା ତୀରେ କଥାଚିତ୍ରରୁ ଅଭିନେତା ଜୀବନ ଆରମ୍ଭ କରିଥିଲେ । ସେ ୧୯୦ରୁ ଅଧିକ ଓଡ଼ିଆ ଚଳଚ୍ଚିତ୍ରରେ ଅଭିନୟ କରିବା ସହ ଗୋଟିଏ ଓଡ଼ିଆ କଥାଚିତ୍ରର ନିର୍ଦ୍ଦେଶନା ଦେଇଥିଲେ ।

ରାଷ୍ଟ୍ରୀୟ ନାଟ୍ୟ ବିଦ୍ୟାଳୟରେ ପଢୁଥିବା ସମୟରେ କାହାଣୀକର ବସନ୍ତ ମହାପାତ୍ରଙ୍କ ଡାକରାରେ "ସଂକଳ୍ପ" ଚଳଚ୍ଚିତ୍ରରେ ଅଭିନୟ କରି କଟକ ଚାଲି ଆସିଥିଲେ । କିନ୍ତୁ ଚଳଚ୍ଚିତ୍ରଟି ସମ୍ପୂର୍ଣ୍ଣ ହୋଇପାରିନଥିଲା । ୧୯୭୭ ମସିହା ଜାନୁଆରୀ ୧୪ତାରିଖରେ, ସେ ଉତ୍କଳ ସଙ୍ଗୀତ ମହାବିଦ୍ୟାଳୟରେ ନାଟକ ବିଭାଗର ଅଧ୍ୟାପକ ଭାବରେ ଯୋଗ ଦେଇଥିଲେ । ସେହି ବର୍ଷ ବିପ୍ଳବ ରାୟଚୌଧୁରୀଙ୍କ ନିର୍ଦ୍ଦେଶନାରେ ଚିଲିକା ତୀରେରେ ସେ ଅଭିନୟ କରିଥିଲେ । ଚିଲିକା ତୀରେ ତାଙ୍କ ଅଭିନୀତ ପ୍ରଥମ କଥାଚିତ୍ର ହୋଇଥିଲେ ମଧ୍ୟ, ନାଗଫାସ ପ୍ରଥମେ ମୁକ୍ତିଲାଭ କରିଥିଲା । ନାଗଫାସର ଖଳନାୟକ ଚରିତ୍ର ଦେଖି ତାଙ୍କୁ ଅଧିକରୁ ଅଧିକ କାମ ମିଳିବାକୁ ଲାଗିଲା । ୧୯୮୩ ମସିହାର କାବେରୀ ଚଳଚ୍ଚିତ୍ରରେ ତାଙ୍କୁ ସକାରାତ୍ମକ ଭୂମିକାରେ ଦେଖିବାକୁ ମିଳିଲା । ଏହାପରେ ବହୁ ଚଳଚ୍ଚିତ୍ରରେ ମୁଖ୍ୟ ଭୂମିକାରେ ଆସି ସେ ନିଜ ବହୁମୁଖୀ ଅଭିନୟ ଦକ୍ଷତା ସାବ୍ୟସ୍ତ କରିପାରିଥିଲେ । ୧୯୮୭ରେ ଭୁଲି ହୁଏନା ଚଳଚ୍ଚିତ୍ର ମାଧ୍ୟମରେ ସେ ନିର୍ଦ୍ଦେଶନାକୁ ଓହ୍ଲାଇଥିଲେ । ସେ ଚଳଚ୍ଚିତ୍ର ସଫଳ ହୋଇପାରିନଥିଲା । ଦୂରଦର୍ଶନରେ ବହୁ ନାଟକରେ ମଧ୍ୟ ସେ ଅଭିନୟ କରିଥିଲେ ।

ରାଜନୈତିକ ଜୀବନ

୨୦୧୪ ମସିହାରେ, ବିଜୟ କଂଗ୍ରେସ ଦଳରେ ସଭ୍ୟଭାବରେ ଯୋଗ ଦେଇ ଭୁବନେଶ୍ୱର ଲୋକ ସଭା ଆସନରୁ ନିର୍ବାଚନ ଲଢ଼ିଥିଲେ । ଏହି ନିର୍ବାଚନରେ ସେ ପରାଜୟ ବରଣ କରିଥିଲେ ଓ କିଛି ବର୍ଷ ପରେ ସେ କଂଗ୍ରେସ ଦଳରୁ ଇସ୍ତଫା ଦେଇ ସକ୍ରିୟ ରାଜନୀତିରୁ ଦୂରେଇ ଯାଇଥିଲେ ।

ବ୍ୟକ୍ତିଗତ ଜୀବନ

ସେ ଅଭିନେତ୍ରୀ ତନ୍ଦ୍ରା ରାୟଙ୍କୁ ବିବାହ କରିଥିଲେ ଓ ତାଙ୍କର ଗୋଟିଏ ଝିଅ ଅଛି ।

ମୃତ୍ୟୁ

୨୦ ଜୁଲାଇ ୨୦୨୦ରେ ଭୁବନେଶ୍ୱରସ୍ଥିତ ଏକ ଘରୋଇ ଡାକ୍ତରଖାନାରେ ବିଜୟ ମହାନ୍ତିଙ୍କର ୭୦ ବର୍ଷ ବୟସରେ ଶାରୀରିକ ଅସୁସ୍ଥତା ଯୋଗୁଁ ପରଲୋକ ଘଟିଥିଲା ।

ଅଭିନୀତ ଓଡ଼ିଆ କଥାଚିତ୍ର

• କର୍ତ୍ତବ୍ୟ, ୨୦୨୩
• ସେଲଫିସ୍ ଦିଲ୍, ୨୦୧୯
• ଗୋଲ୍ ମାଲ୍ ଲଭ୍ ୨୦୧୯
• ପିଲାଟା ବିଗିଡ଼ିଗଲା, ୨୦୧୫
• ହାତ ଧରି ଚାଲୁଥା, ୨୦୧୩
• ଲୁଚକାଳି, ୨୦୧୨
• ଛାତିରେ ଲେଖିଛି ତୋରି ନାଁ, ୨୦୧୧
• ସତ୍ୟମେବ ଜୟତେ, (୨୦୦୮)
• ଚକା ଚକା ଭଉଁରୀ, ୨୦୦୭
• ନାରୀ ନୁହେଁ ତୁ ନାରାୟଣୀ, ୨୦୦୭
• ଧର୍ମର ହେବ ଜୟ, ୨୦୦୫
• ସିନ୍ଦୂର ନୁହେଁ ଖେଳଘର, ୨୦୦୨
• କିଏ ପୋଛିବ ମା' ଆଖିର ଲୁହ, ୧୯୯୯
• ମନ ରହିଗଲା ତୁମରି ଠାରେ, ୧୯୯୯
• କୃଷ୍ଣା କାବେରୀ, ୧୯୯୯
• ବୋଉ, ୧୯୯୮
• ସନ୍ତାନ, ୧୯୯୮
• ଭାଇ ହେଲା ଭଗାରି, ୧୯୯୪
• ଲକ୍ଷେ ଶିବ ପୂଜି ପାଇଛି ପୁଅ, ୧୯୯୪
• ଭାଗ୍ୟ ହାତେ ଡୋରି, ୧୯୯୩
• ଭୀଷ୍ମ ପ୍ରତିଜ୍ଞା, ୧୯୯୩
• ଆମ ଘର ଆମ ସଂସାର, ୧୯୯୧
• ମମତାର ଡୋରି, ୧୯୮୯
• ସାଗର, ୧୯୮୯
• ଟୋପାଏ ସିନ୍ଦୂର ଦି ପଟ ଶଙ୍ଖା, ୧୯୮୯
• ପଞ୍ଚୁପାଣ୍ତବ, ୧୯୮୯
• ପ୍ରତିଶୋଧ ଅପରାଧ ନୁହେଁ, ୧୯୮୯
• ଏଇ ଆମ ସଂସାର, ୧୯୮୬
• ସମୟ ବଡ଼ ବଳବାନ, ୧୯୮୫
• ମମତା ମାଗେ ମୂଲ, ୧୯୮୫
• ଦଣ୍ଡା ବାଳୁଙ୍ଗା, ୧୯୮୪
• ଆରତୀ, ୧୯୮୧
• ନାଗଫାସ, ୧୯୭୭ (ଖଳନାୟକ ଭାବେ)

ମାନ ସମ୍ମାନ

• ଜୟଦେବ ସମ୍ମାନ, ୨୦୧୪
• ରାଜ୍ୟ ଚଳଚ୍ଚିତ୍ର ପୁରସ୍କାର
  • ଶ୍ରେଷ୍ଠ ଅଭିନେତା (୫ଥର)
    • ୧୯୮୧ (ଆରତୀ)
    • ୧୯୮୬ (ଏଇ ଆମ ସଂସାର)
    • ୧୯୯୩, (ଭୀଷ୍ମ ପ୍ରତିଜ୍ଞା)
    • ୧୯୯୪, (ଭାଇ ହେଲା ଭଗାରି)
    • ୧୯୯୮, (ବୋଉ)
  • ଶ୍ରେଷ୍ଠ ସହ-ଅଭିନେତା (୩ଥର)
    • ୧୯୮୫ (ମମତା ମାଗେ ମୂଲ)
    • ୧୯୮୯ (ପ୍ରତିଶୋଧ ଅପରାଧ ନୁହେଁ)
    • ୨୦୦୮ (ସତ୍ୟମେବ ଜୟତେ)
  • ଶ୍ରେଷ୍ଠ ହାସ୍ୟ କଳାକାର (୧ଥର)
    • ୧୯୯୧ (ଆମ ଘର ଆମ ସଂସାର)
• ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର, ୨୦୦୯ (ନାଟକ 'ଅଜାତି' ନିମନ୍ତେ)

ଅଧିକ ତଥ୍ୟ

• ଇଣ୍ଟରନେଟ ମୁଭି ଡାଟାବେସରେ ବିଜୟ ମହାନ୍ତି