ଅନୀତା ଦାସ

ଅନୀତା ଦାସ (ଜନ୍ମ: ଅକ୍ଟୋବର ୧, ୧୯୫୩) ଜଣେ ଓଡ଼ିଆ କଥାଚିତ୍ର ଅଭିନେତ୍ରୀ । ସେ ୧୦୦ରୁ ଅଧିକ ଓଡ଼ିଆ, ବଙ୍ଗଳା ଓ ହିନ୍ଦୀ ସିନେମାରେ କାମ କରିଛନ୍ତି ।

ଅନୀତା ଦାସ
ଜନ୍ମ	ନୟାଗଡ
ମୃତ୍ୟୁ	ମଇ ୧୧, ୨୦୧୮(୨୦୧୮-୦୫-୧୧) କଟକ, ଓଡ଼ିଶା
ଜାତୀୟତା	ଭାରତୀୟ
ବୃତ୍ତି	ଅଭିନୟ
ସକ୍ରିୟ ବର୍ଷ	୧୯୭୬-୨୦୧୮
ପ୍ରସିଦ୍ଧି	ଅଭିନେତ୍ରୀ

ପ୍ରାରମ୍ଭିକ ଜୀବନ ଓ ଶିକ୍ଷା

ଅନୀତା ଦାସ ଓଡ଼ିଶାର ନୟାଗଡ ଜିଲ୍ଲାରେ ଜନ୍ମ ଗ୍ରହଣ କରିଥିଲେ । ତାଙ୍କର ପିତା ଥିଲେ ବନମାଳୀ ଦାସ ଓ ମା' ସତ୍ୟଭାମା ଦାସ । ଗାଁ ବିଦ୍ୟାଳୟରେ ପାଠପଢି ୧୯୭୩ ମସିହାରେ ସେ କଟକ ଆସିଥିଲେ ଓ ଶୈଳବାଳା ମହିଳା ମହାବିଦ୍ୟାଳୟରେ ପାଠ ପଢ଼ିବା ସ‌ହ କଳା ବିକାଶ କେନ୍ଦ୍ରର ଛାତ୍ରାବାସରେ ରହି ନୃତ୍ୟ ଶିକ୍ଷା କରିଥିଲେ । ସେହି ସମୟରେ ସେ ଗୁରୁ କେଳୁଚରଣ ମହାପାତ୍ର ଓ ରଘୁନାଥ ଦାଶଙ୍କଠାରୁ ଓଡ଼ିଶୀ ଶିକ୍ଷା କରିଥିଲେ ।

କଥାଚିତ୍ର ଜୀବନ

ସ୍ନାତ୍ତକର ଶେଷ ବର୍ଷରେ, ୧୯୭୫ ମସିହାରେ ଯାଯାବର କଥାଚିତ୍ରରୁ ଅଭିନେତ୍ରୀ ଜୀବନ ଆରମ୍ଭ କରିଥିବା ଅନୀତା, ନିଜ ପ୍ରଥମ ସଂଳାପରେ ଅଭିଜ୍ଞ ହେମନ୍ତ ଦାସଙ୍କ ବିପକ୍ଷରେ କ‌ହିଥିଲେ,

ତୁମର ତ ଆସିବାର ନଥିଲା, କେମିତି ଆସିଲ ?

। ୧୯୭୬ରେ ମୁକ୍ତିଲାଭ କରିଥିବା, ଦ୍ୱିତୀୟ ଚଳଚ୍ଚିତ୍ର ନାଗଫାଶରୁ କିନ୍ତୁ ସେ ଲୋକପ୍ରିୟତା ଅର୍ଜନ କରିଥିଲେ । ଏଥିରେ ତାଙ୍କ ଉପରେ ଆଧାରିତ ରମ୍ୟ ସଙ୍ଗୀତ 'ନାଥ ନାଥ ହେ ନାଥ, ମୋ ପ୍ରାଣ ନାଥ' ଲୋକପ୍ରିୟତା ଅର୍ଜନ କରିବା ସ‌ହ ତାଙ୍କ ପ୍ରଦର୍ଶନ‌କୁ ମଧ୍ୟ ସମସ୍ତେ ପସନ୍ଦ କରିଥିଲେ । ୧୯୮୩ରେ 'ଭକ୍ତ ସାଲବେଗ' ଚଳଚ୍ଚିତ୍ରରେ ସେ ପ୍ରଥମ ଥର ପାଇଁ ମା' ଭୂମିକାରେ ଅଭିନୟ କରିଥିଲେ । ତାଙ୍କ ଅଭିନୟ ଜୀବନରେ ଭିନ୍ନ ମୋଡ ଆଣିଥିଲା ଚଳଚ୍ଚିତ୍ର, ପୁଅ ମୋର କଳାଠାକୁର ଓ ଏହା ପରେ ସେ ସିନେ ଜଗତରେ ମା' ଭାବେ ପରିଚିତ ହୋଇଥିଲେ । ଦୀର୍ଘ ୪୩ ବର୍ଷ ଧରି ସେ ସିନେ ଜଗତରେ ସକ୍ରିୟ ଥିଲେ । ତାଙ୍କ ଅଭିନୀତ ଶେଷ ଚଳଚ୍ଚିତ୍ର ହେଉଛି, ୨୦୧୮ ମସିହାରେ ମୁକ୍ତିଲାଭ କରିଥିବା, ଏକ୍ସ୍‌କ୍ୟୁଜ୍ ମି ।

ରାଜନୀତି ଜୀବନ

ତ‌ତ୍‌କାଳୀନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ସମୟରେ ତାଙ୍କୁ ଧର୍ମଶାଳା ଆସନରେ ପାର୍ଥୀ କରିବା ପାଇଁ ନିଷ୍ପତି ହୋଇଥିଲେ ମଧ୍ୟ ସେ ମନା କରିଦେଇଥିଲେ । ଏହାପରେ ୧୯୯୨ରେ କଂଗ୍ରେସ ତରଫରୁ ସେ ଯାଜପୁର ରୋଡ଼୍‌ରୁ ଅଧ୍ୟକ୍ଷା ପାର୍ଥୀ ହୋଇ ଅଳ୍ପକେ ପରାଜିତ ହୋଇଥିଲେ ।ଏହାପରେ ସେ ରାଜନୀତିରୁ ଦୂରେଇ ଯାଇଥିଲେ ।

ଓଡ଼ିଆ କଥାଚିତ୍ର

• ଏକ୍ସ୍‌କ୍ୟୁଜ୍ ମି, ୨୦୧୮
• କାବୁଲା ବାରବୁଲା, ୨୦୧୭
• ଏ ମନ ଖୋଜେ ମନଟିଏ, ୨୦୧୧
• ଆସିବୁ କେବେ ସାଜି ମୋ ରାଣୀ, ୨୦୧୦
• ଓଁ ନମଃ ଶିବାୟ, ୨୦୧୦
• ଆଲୋ ମୋର କଣ୍ଢେଇ, ୨୦୧୦
• ଆମ ଭିତରେ କିଛି ଅଛି, ୨୦୧୦
• ସ୍ୱୟଂସିଦ୍ଧା, ୨୦୧୦
• ଡନ୍, ୨୦୧୦
• ଆକାଶେ କି ରଙ୍ଗ ଲାଗିଲା, ୨୦୦୯
• ଶାଶୁ ହାତକଡ଼ି ଭାଉଜ ବେଡି, ୧୯୯୯
• ଲକ୍ଷ୍ମଣ ରେଖା, ୧୯୯୬
• ପାଚେରୀ ଉଠିଲା ମଝି ଦୁଆରୁ, ୧୯୯୪
• ଗଢ଼ି ଜାଣିଲେ ଘର ସୁନ୍ଦର, ୧୯୯୪
• ଅଣ୍ଟି ଛୁରୀ ତଣ୍ଟି କାଟେ, ୧୯୯୨
• ସୁଖ ସଂସାର, ୧୯୯୨
• ମୁକ୍ତି ତୀର୍ଥ, ୧୯୯୨
• କି ହେବ ଶୁଆ ପୋଷିଲେ, ୧୯୯୧
• ଠାକୁର ଅଛନ୍ତି ଚଉବାହାକୁ, ୧୯୯୦
• ପାପପୁଣ୍ୟ, ୧୯୮୮
• ପୁଅ ମୋ କଳା ଠାକୁର, ୧୯୮୮
• ଶୁନା ଚଢ଼େଇ, ୧୯୮୮
• ଜୟଦେବ, ୧୯୮୭
• ଏଇତ ଦୁନିଆ, ୧୯୮୭
• ବାବୁଲା, ୧୯୮୬
• ମମତା ମାଗେ ମୂଲ, ୧୯୮୫
• ସଂସ୍କାର, ୧୯୮୫
• ଜନନୀ, ୧୯୮୪
• ସ୍ୱପ୍ନ ସାଗର, ୧୯୮୩
• ଭକ୍ତ ସାଲବେଗ, ୧୯୮୩
• ଝିଅଟି ସୀତା ପରି, ୧୯୮୩
• ରାମ ରହିମ, ୧୯୮୩
• ଫୁଲ ଚନ୍ଦନ, ୧୯୮୨
• ଅସ୍ତରାଗ, ୧୯୮୨
• ତପସ୍ୟା, ୧୯୮୦
• ପରିବାର, ୧୯୭୮
• କୃଷ୍ଣ ସୁଦାମା, ୧୯୭୬
• ଯାଯାବର, ୧୯୭୫

ହିନ୍ଦୀ ଚଳଚ୍ଚିତ୍ର

• ଭିଗି ପଲକେଁ
• ଆଶ୍ରୟ
• ବାବୁଲା

ପୁରସ୍କାର

• ବାଣୀଚିତ୍ର ଲାଇଫ ଟାଇମ ଆଚିଭମେଣ୍ଟ ଆୱାର୍ଡ଼
• 'ଭକ୍ତ ସାଲବେଗ', 'ତପସ୍ୟା' ଓ 'ଏଇତ ଦୁନିଆ' ଚଳଚ୍ଚିତ୍ର ପାଇଁ ରାଜ୍ୟ ସରକାରଙ୍କଦ୍ୱାରା ସମ୍ମାନିତ ।
• ଚିତ୍ରପୁରୀ
• ବାଣୀ ଚିତ୍ର
• ସିନେମା ସଂସାର
• ଚଳଚ୍ଚିତ୍ର ଜଗତ
• ସିନେକ୍ରିଟିକ୍

ମୃତ୍ୟୁ

୨୦୧୮ ମସିହା ମଇ ମାସ ୧୧ ତାରିଖରେ ଅନୀତାଙ୍କର କଟକ ମିଶନରୋଡ଼ସ୍ଥିତ ବାସଭବନରେ ହୃଦ୍‌ଘାତରେ ତିରୋଧାନ ଘଟିଥିଲା ।

ଅଧିକ ତଥ୍ୟ

• ଇଣ୍ଟରନେଟ ମୁଭି ଡାଟାବେସରେ ଅନୀତା ଦାସ