ପ୍ରମିଳା ବିଶୋଇ

ପ୍ରମିଳା ବିଶୋଇ ହେଉଛନ୍ତି ଜଣେ ଭାରତୀୟ ରାଜନୀତିଜ୍ଞ, ସମାଜସେବୀ ଏବଂ କବି । ସେ ଭାରତର ୧୭ତମ ଲୋକ ସଭାକୁ ଆସ୍କାରୁ ନିର୍ବାଚିତ ହୋଇଥିଲେ । ସେ ୨୦୧୯ ଭାରତୀୟ ସାଧାରଣ ନିର୍ବାଚନରେ ବିଜୁ ଜନତା ଦଳ ତରଫରୁ ପ୍ରତିନିଧିତ୍ୱ କରିଥିଲେ । ଏଥିରେ ସେ ତାଙ୍କର ନିକଟତମ ପ୍ରତିଦ୍ୱନ୍ଦୀ ଭାରତୀୟ ଜନତା ପାର୍ଟିର ଅନିତା ଶୁଭଦର୍ଶିନୀଙ୍କୁ ୨,୦୪,୭୦୭ ଖଣ୍ଡ ଭୋଟରେ ପରାସ୍ତ କରିଥିଲେ ।

ପ୍ରମିଳା ବିଶୋଇ
ସାଂସଦ: ୧୭ଶ ଲୋକ ସଭା
କାର୍ଯ୍ୟକାଳ ୨୦୧୯ – ୨୦୨୪
ପୂର୍ବ ଅଧିକାରୀ	ଲଡୁ କିଶୋର ସ୍ୱାଇଁ
ପର ଅଧିକାରୀ	ଅନୀତା ଶୁଭଦର୍ଶିନୀ
ନିର୍ବାଚନ ମଣ୍ଡଳୀ	ଆସ୍କା
ବ୍ୟକ୍ତିଗତ ସବିଶେଷ
ଜନ୍ମ	୧୯୪୯ ମସିହା, ୭୦ ବର୍ଷ ଚେରମାରିଆ, ନଳବଣ୍ଟା
ରାଜନୀତିକ ଦଳ	ବିଜୁ ଜନତା ଦଳ
ଜୀବନ ସାଥୀ	ବାଞ୍ଛାନିଧି ବିଶୋଇ
ସନ୍ତାନ	୪
ଘର	ଚେରମାରିଆ, ନଳବଣ୍ଟା, ଆସ୍କା, ଗଞ୍ଜାମ, ଓଡ଼ିଶା
ବୃତ୍ତି	କୃଷକ ଏବଂ ସମାଜସେବୀ

ଶିକ୍ଷା ଏବଂ ବ୍ୟକ୍ତିଗତ ଜୀବନ

ପ୍ରମିଳା, ପଞ୍ଚମ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ିଥିଲେ । ସେ କେବଳ ଓଡ଼ିଆ ଭାଷା ଶିଖିଛନ୍ତି । ତାଙ୍କର ଦୁଇଟି ପୁତ୍ର ଏବଂ ଦୁଇଟି କନ୍ୟା ସନ୍ତାନ ଅଛନ୍ତି । ସେ ମାତ୍ର ପାଞ୍ଚ ବର୍ଷ ବୟସରେ ବାଞ୍ଛାନିଧି ବିଶୋଇଙ୍କୁ ବିବାହ କରିଥିଲେ । ବାଞ୍ଛାନିଧି ଜଣେ ଅବସରପ୍ରାପ୍ତ ସରକାରୀ ଚାକିରିଆ ଏବଂ କୃଷକ ଅଟନ୍ତି । ତାଙ୍କର ବଡ଼ ପୁଅ, ଦିଲୀପ ଏକ ଚା' ଦୋକାନ ଖୋଲିଥିଲା ବେଳେ, ସାନ ପୁଅ, ରଞ୍ଜନ ଏକ ଗାଡ଼ି ଗ୍ୟାରେଜରେ କାମ କରନ୍ତି । ଦୁଇ ଝିଅ ରୁନୁ ଏବଂ ସୁଲତା ବିବାହ କରି ଶାଶୁଘରେ ରହୁଛନ୍ତି । ତାଙ୍କର କୌଣସି ନିରବଛିନ୍ନ ଆୟ ନାହିଁ, ଜମିରେ ଗହମ ଏବଂ ମାଣ୍ଡିଆ ଚାଷ କରି ପାଖାପାଖି ବର୍ଷକୁ ୧୦,୦୦୦ରୁ ୧୨,୦୦୦ ଆୟ କରନ୍ତି ।

ସମାଜ ସେବା ଏବଂ କାମ

ସେ ପାଖାପାଖି ୧୯୯୯ ମସିହାରୁ ତାଙ୍କର ରାଜନୈତିକ ଜୀବନ ପ୍ରାରମ୍ଭ କରିଥିଲେ । ଗଞ୍ଜାମ ଜିଲ୍ଲାର ନଳବଣ୍ଟାରେ ଥିବା ସାତ ଶଙ୍ଖ ସ୍ୱୟଂ ସହାୟକ ଗୋଷ୍ଠୀ ସହିତ ସେ ଜଡ଼ିତ । ଏହି ଗୋଷ୍ଠୀ ଜରିଆରେ ସେ ବିଦ୍ୟାଳୟରେ ମଧ୍ୟାହ୍ନ ଭୋଜନ ପରିବେଷଣ କରୁଥିଲେ । ପ୍ରମିଳା ତାଙ୍କ ଗ୍ରାମରେ ବହୁ ସ୍ୱୟଂ ସହାୟକ ଗୋଷ୍ଠୀ ସହିତ ଜଡ଼ିତ ରହି ନିଜ ଉଦ୍ୟମରେ ନିଜ ଗ୍ରାମକୁ ଖୋଲା ଶୌଚମୁକ୍ତ ଗ୍ରାମ କରିପାରିଥିଲେ । ଏହାଛଡ଼ା ସେ ତାଙ୍କ ଗାଁ ନିକଟସ୍ଥ ପାକିଡି ପାହାଡ଼ରେ ଥିବା ପିକକ ପ୍ରୋଟେକ୍ସନ ସମିତି ବା ମୟୁର ସୁରକ୍ଷା ସମିତିର ଜଣେ ସକ୍ରିୟ ସଦସ୍ୟା ଅଟନ୍ତି ।

ପୁରସ୍କାର ଏବଂ ସମ୍ମାନ

• ପ୍ରକୃତି ମିତ୍ର
• ପ୍ରକୃତି ବନ୍ଧୁ