ହରମୋହନ ଖୁଣ୍ଟିଆ

ହରମୋହନ ଖୁଣ୍ଟିଆ, ଜଣେ ଓଡ଼ିଆ ସଙ୍ଗୀତଜ୍ଞ । ତବଲା, ପଖଉଜ ଓ ମୃଦଙ୍ଗ ବାଦନରେ ଦକ୍ଷ ହରମୋହନ ଓଡ଼ିଶୀ ନୃତ୍ୟ ପାଇଁ ବହୁ ସଙ୍ଗୀତ ନିର୍ଦ୍ଦେଶନା କରିଛନ୍ତି ।

ହରମୋହନ ଖୁଣ୍ଟିଆ
ଜନ୍ମ	ମଠକରଗୋଳା, କାମାକ୍ଷାନଗର, ଢେଙ୍କାନାଳ
ଜାତୀୟତା	ଭାରତୀୟ
ପ୍ରସିଦ୍ଧି	ମର୍ଦ୍ଦଳ ବାଦକ ଓ ସଙ୍ଗୀତ ନିର୍ଦ୍ଦେଶକ
ସନ୍ତାନ	ସୁପ୍ରକାଶ, ସ୍ୱର୍ଣ୍ଣ

ବାଲ୍ୟଜୀବନ ଓ ଶିକ୍ଷା

ହରମୋହନ, ଢେଙ୍କାନାଳ ଜିଲ୍ଲାର କାମାକ୍ଷାନଗର ଅନ୍ତର୍ଗତ ମଠକରଗୋଳା ଗ୍ରାମର ଏକ ସଙ୍ଗୀତଜ୍ଞ ପରିବାରରେ ଜନ୍ମଗ୍ରହଣ କରିଥିଲେ । ପିତା ଓ ବଡ଼ଭାଇ ଥିଲେ ପାଲା ଗାୟକ । ଛୋଟବେଳୁ କୀର୍ତ୍ତନ ଉପଭୋଗ କରୁଥିଲେ । ମାଟି କାନ୍ଥରେ ହାତ ବାଡ଼େଇ ସଙ୍ଗୀତ ସୃଷ୍ଟି କରୁଥିଲେ । ପାଞ୍ଚବର୍ଷ ବୟସରୁ ବିନା ଗୁରୁରେ ସଙ୍ଗୀତ ଚର୍ଚ୍ଚା ଆରମ୍ଭ କରିଥିଲେ । ପୁଅରୁ ଦକ୍ଷତା ଦେଖି, ପିତା ତାଙ୍କୁ କଟକର ସାର୍ତ୍ତୋଳକୁ ନେଇ ଆସିଥିଲେ । ସେଠାରେ ଦିନେ ଏକ କୀର୍ତ୍ତନ ସମାବେଶରେ, ତାଙ୍କ ମୃଦଙ୍ଗ ବାଦନ ଶୁଣି, ଠିକାଦାର ଜଳଧର ସ୍ୱାଇଁ, ତାଙ୍କ ସଙ୍ଗୀତ ଶିକ୍ଷାର ବ୍ୟବସ୍ଥା କରିଦେଇଥିଲେ । କଟକରେ ଏକାଧିକ ଗୁରୁଙ୍କଠାରୁ ତବଲା ବାଦାନ ଶିକ୍ଷା କରିବା ସହ, ଠିକାଦାରି ମଧ୍ୟ କରୁଥିଲେ । କିଛି ବର୍ଷ ପରେ, ସେ କଲିକତା ଚାଲିଯାଇ ଗୁରୁ ଜ୍ଞାନ ପ୍ରକାଶ ଘୋଷ ଓ ମଣିଲାଲ ମୁଖାର୍ଜୀଙ୍କଠାରୁ ତବଲା ଶିକ୍ଷାଲାଭ କରିଥିଲେ ।

ବୃତ୍ତିଗତ ଜୀବନ

କଲିକତାରୁ ଫେରି, ହରମୋହନ ୧୯୬୭ ମସିହାରେ ଉତ୍କଳ ସଙ୍ଗୀତ ମହାବିଦ୍ୟାଳୟରେ ଶିକ୍ଷକତା ଆରମ୍ଭ କରିଥିଲେ । ୧୯୭୦ ମସିହାରେ ଆକାଶବାଣୀ କଟକରେ ଜଣେ ଷ୍ଟାଫ ଆର୍ଟିଷ୍ଟ ଭାବରେ ଯୋଗଦାନ କରିଥିଲେ । ଜଣେ ମର୍ଦ୍ଦଳ ବାଦକ ଭାବରେ ସେ ସଂଯୁକ୍ତା ପାଣିଗ୍ରାହୀ ଓ ରଘୁନାଥ ପାଣିଗ୍ରାହୀଙ୍କ ସହ ବହୁ ମଞ୍ଚରେ ସଙ୍ଗୀତ ପରିବେଷଣ କରିଛନ୍ତି । ଓଡ଼ିଶୀରେ ପ୍ରାୟ ୩୦୦ରୁ ଉର୍ଦ୍ଧ ସଙ୍ଗୀତ ନିର୍ଦ୍ଦେଶନା ଦେଇଛନ୍ତି । କଳିଙ୍ଗ କଳା କ୍ଷେତ୍ର ନାମରେ ଏକ ଅନୁଷ୍ଠାନ ଗଠନ କରି, ସେ ବିଦ୍ୟାର୍ଥୀମାନଙ୍କୁ ସଙ୍ଗୀତ ଶିକ୍ଷାଦାନ କରିଥାନ୍ତି । ହୋମିଓପାଥୀ ଚିକିତ୍ସାକରି, ଲୋକଙ୍କର ବ୍ୟାଧି ନିରାକରଣ ମଧ୍ୟ କରିଥାନ୍ତି ।

ସମ୍ମାନ ଓ ପୁରସ୍କାର

• ସମ୍ମାନସୂଚକ ଡକ୍ଟରେଟ - ୨୦୧୮ (ଉତ୍କଳ ସଂସ୍କୃତି ବିଶ୍ୱବିଦ୍ୟାଳୟ)
• ଓଡ଼ିଶା ସଙ୍ଗୀତ ନାଟକ ଏକାଡେମୀ ପୁରସ୍କାର - ୨୦୧୧
• ଇଲା ପଣ୍ଡା ସଙ୍ଗୀତ ସମ୍ମାନ - ୨୦୧୯