ନଳିନୀକାନ୍ତ ମହାନ୍ତି

ନଳିନୀକାନ୍ତ ମହାନ୍ତି (୧୯୪୯-୨୦୧୨) ରାଜନଗର ବିଧାନ ସଭା ନିର୍ବାଚନ ମଣ୍ଡଳୀରୁ ୭ଥର ବିଧାନ ସଭାକୁ ନିର୍ବାଚିତ ହୋଇଥିଲେ । ସେ ୧୯୪୯ ମସିହା ଜାନୁଆରୀ୨୦ ତାରିଖରେ କେନ୍ଦ୍ରାପଡ଼ା ଜିଲ୍ଲା ରାଜନଗର ବ୍ଳକର ଫିରିକିଦାଣ୍ଡି ଗ୍ରାମରେ ଜନ୍ମଗ୍ରହଣ କରିଥିଲେ ।

ନଳିନୀକାନ୍ତ ମହାନ୍ତି
ବିଧାୟକ, ରାଜନଗର
କାର୍ଯ୍ୟକାଳ ୧୯୭୭ – ୨୦୦୯
ପୂର୍ବ ଅଧିକାରୀ	ବିଜୟାନନ୍ଦ ପଟ୍ଟନାୟକ
ପର ଅଧିକାରୀ	ଅଲେଖ କୁମାର ଜେନା
ପୂର୍ତ୍ତ, ନଗର ଉନ୍ନୟନ ଓ ସଂସଦୀୟ ବ୍ୟାପାର ମନ୍ତ୍ରୀ
କାର୍ଯ୍ୟକାଳ ୧୬ ମାର୍ଚ୍ଚ ୨୦୦୦ – ୯ ଜୁଲାଇ ୨୦୦୧
ପୂର୍ତ୍ତ ଓ ନଗର ଉନ୍ନୟନ ବିଭାଗ ମନ୍ତ୍ରୀ
କାର୍ଯ୍ୟକାଳ ୧୫ ମାର୍ଚ୍ଚ ୧୯୯୦ – ୧୫ ମାର୍ଚ୍ଚ ୧୯୯୫
ବ୍ୟକ୍ତିଗତ ସବିଶେଷ
ଜନ୍ମ	(1949-01-20)୨୦ ଜାନୁଆରୀ ୧୯୪୯ ଫିରିକିଦାଣ୍ଡି, ରାଜନଗର, କେନ୍ଦ୍ରାପଡ଼ା
ମୃତ୍ୟୁ	୨୦ ଅପ୍ରେଲ ୨୦୧୨(2012-04-20) (ବୟସ ୬୩) ଭୁବନେଶ୍ୱର
ରାଜନୀତିକ ଦଳ	ଭାରତୀୟ ଜାତୀୟ କଂଗ୍ରେସ
ଅନ୍ୟାନ୍ୟ ରାଜନୀତିକ ସମ୍ବନ୍ଧ	ବିଜୁ ଜନତା ଦଳ, ଜନତା ଦଳ, ଜନତା ପାର୍ଟି, ଭାରତୀୟ ଲୋକଦଳ
ଜୀବନ ସାଥୀ	ଜ୍ୟୋତ୍ସ୍ନା ମହାନ୍ତି
ସନ୍ତାନ	୧ ପୁଅ, ୧ ଝିଅ
ୱେବସାଇଟ	Official Website

୧୯୬୯ରେ ଜଣେ ଛାତ୍ର ନେତା ଭାବେ ରାଜନୈତିକ ଜୀବନ ଆରମ୍ଭ କରିଥିଲେ । ତତ୍କାଳୀନ ଭାରତୀୟ ଲୋକଦଳର ସମ୍ପାଦକ ଭାବେ ଓ ଜନତାପାର୍ଟିର କାର୍ଯ୍ୟକାରିଣୀ (ଯୁବଶାଖା)ର ସମ୍ପାଦକ ହୋଇ ପରେ ରାଜ୍ୟ ଜନତା ପାର୍ଟିର ବିଧାୟକ ଦଳ ସମ୍ପାଦକ ହୋଇଥିଲେ । ସର୍ବଭାରତୀୟ ଯୁବଜନତାର ଜାତୀୟ ପରିଷଦ ସଦସ୍ୟ ହୋଇଥିଲେ ଓ ୧୯୮୨ରେ ସେ ରାଜ୍ୟ ଯୁବଜନତାର ସଭାପତି ଦାୟିତ୍ୱ ନିର୍ବାହ କରିଥିଲେ ।

ଜନତା ଦଳରୁ ନିଜର ରାଜନୈତିକ ଜୀବନ ଆରମ୍ଭ କରିଥିବା ନଳିନୀ ୧୯୭୭ରେ ପ୍ରଥମ ଥର ପାଇଁ ରାଜନଗରରୁ ସପ୍ତମ ବିଧାନ ସଭାକୁ ନିର୍ବାଚିତ ହୋଇଥିଲେ । ୧୯୮୦ରେ କଂଗ୍ରେସ ବହୁମତ ପାଇଥିବା ୮ମ ବିଧାନ ସଭାକୁ ଲୋକଦଳ ଟିକଟରେ, ୧୯୮୫ରେ ଜନତା ଦଳରୁ ବିଧାୟକ ଭାବେ ନିର୍ବାଚିତ ହୋଇଥିଲେ । ୧୯୯୦ରେ ଜନତା ଦଳ ଟିକଟରେ ପୁନଃନିର୍ବାଚିତ ହୋଇ ୧୯୯୦ରୁ ୧୯୯୫ ପର୍ଯ୍ୟନ୍ତ ବିଜୁ ପଟ୍ଟନାୟକଙ୍କ ମନ୍ତ୍ରୀମଣ୍ଡଳରେ ପୂର୍ତ୍ତ ଓ ନଗର ଉନ୍ନୟନ ବିଭାଗ ମନ୍ତ୍ରୀପଦ ଗ୍ରହଣ କରିଥିଲେ। ୧୯୯୫ରେ ବିଜୁ ଜନତା ଦଳ ପକ୍ଷରେ ବହୁମତ ଥିବାବେଳେ ମଧ୍ୟ ସେ ନିର୍ବାଚିତ ହୋଇଥିଲେ । ୧୯୯୭ରେ ବିଜୁ ଜନତା ଦଳ ଗଠନ ହେବା ସମୟରେ ଯୋଗଦେଇ ନ ଥିବା ନଳିନୀ ୨୦୦୦ରେ ନିର୍ବାଚନ ଅବ୍ୟବହିତ ପୂର୍ବରୁ ବିଜୁ ଜନତା ଦଳରେ ଯୋଗଦେବା ସହ ଦଳର କାର୍ଯ୍ୟକାରୀ ସଭାପତି ପଦ ଗ୍ରହଣ କରିଥିଲେ। ନବୀନ ପଟ୍ଟନାୟକଙ୍କ ନେତୃତ୍ୱରେ ଗଠିତ ମନ୍ତ୍ରୀମଣ୍ଡଳରେ ସେ ପୂର୍ତ୍ତ, ନଗର ଉନ୍ନୟନ ଓ ସଂସଦୀୟ ବ୍ୟାପାର ମନ୍ତ୍ରୀ ଭାବେ ଦାୟିତ୍ୱ ତୁଲାଇଥିଲେ । ପରେ ଦୁର୍ନିତି ଅଭିଯୋଗରେ ତାଙ୍କୁ ମନ୍ତ୍ରୀମଣ୍ଡଳରୁ ବହିସ୍କାର କରାଯାଇଥିଲା । ୨୦୦୪ରେ ତାଙ୍କୁ ବିଜୁ ଜନତା ଦଳ ଟିକଟ ନ ମିଳିବାରୁ ସେ କଂଗ୍ରେସ ଟିକଟରେ ନିର୍ବାଚନ ଲଢ଼ି ବିଜୟୀ ହୋଇଥିଲେ । ୨୦୦୯ରେ ସେ ଲଢ଼ିଥିବା ଶେଷ ବିଧାନ ସଭା ନିର୍ବାଚନରେ ପ୍ରଥମ ଥର ନିମନ୍ତେ ପରାଜିତ ହୋଇଥିଲେ। ସେ ଓଡ଼ିଶା ପ୍ରଦେଶ କଂଗ୍ରେସ କମିଟିର ଉପସଭାପତି ଭାବେ କିଛି ଦିନ କାର୍ଯ୍ୟ କରିଥିଲେ ।

୧୧ ଅକ୍ଟୋବର ୨୦୧୧ରେ ଛାତିରେ ଯନ୍ତ୍ରଣା ଅନୁଭବ କରିବାରୁ ତାଙ୍କୁ ଆଦିତ୍ୟ କେୟାର ହସପିଟାଲରେ ଭର୍ତ୍ତି କରାଯାଇଥିଲା । ପରେ ତାଙ୍କ ସ୍ୱାସ୍ଥ୍ୟବସ୍ଥାରେ ଉନ୍ନତି ନ ହେବାରୁ ୨ ନଭେମ୍ବରରେ ଅଖିଳ ଭାରତୀୟ ଆୟୁର୍ବିଜ୍ଞାନ ପ୍ରତିଷ୍ଠାନକୁ ତାଙ୍କୁ ସ୍ଥାନାନ୍ତରିତ କରାଯାଇଥିଲା । ମାତ୍ର ଉନ୍ନତ ଚିକିତ୍ସା ସତ୍ତ୍ୱେ ସ୍ୱାସ୍ଥ୍ୟାବସ୍ଥାରେ ଉନ୍ନତି ନ ହେବାରୁ ଡାକ୍ତରଙ୍କ ପରାମର୍ଶ କ୍ରମେ ଭୁବନେଶ୍ୱରକୁ ଅଣାଯାଇ ମୃତ୍ୟୁର କିଛିଦିନ ପୂର୍ବରୁ ଭୁବନେଶ୍ୱରସ୍ଥ ସମ ହସପିଟାଲକୁ ଅଣାଯାଇ ତାଙ୍କ ଚିକିତ୍ସା କରାଯାଉଥିଲା । ୨୦ ଅପ୍ରେଲ ୨୦୧୨ ଅପରାହ୍ନ ୨.୪୫ରେ କୋମା ଅବସ୍ଥାରେ ଥାଇ ତାଙ୍କର ପରଲୋକ ଘଟିଥିଲା । ପୁରୀ ସ୍ୱର୍ଗଦ୍ୱାରଠାରେ ତାଙ୍କ ଶେଷକୃତ୍ୟ ସମ୍ପନ୍ନ ହୋଇଥିଲା ।