କ୍ରିଷ୍ଣା ପଟେଲ

କ୍ରିଷ୍ଣା ପଟେଲ (ଜନ୍ମ: ୨୮ ନଭେମ୍ବର ୧୯୫୭) ଜଣେ ଓଡ଼ିଆ କଣ୍ଠଶିଳ୍ପୀ । ରଙ୍ଗବତୀ ଗୀତର ଗାୟିକ ଭାବରେ ସେ ପରିଚିତ । ଏହି ଗୀତ ସେ ଜିତେନ୍ଦ୍ର ହରିପାଲଙ୍କ ସହିତ ଗାଇଥିଲେ । ମିତ୍ରଭାନୁ ଗଉନ୍ତିଆ ଏହି ଗୀତଟିକୁ ରଚନା କରିଥିଲେ ଓ ପ୍ରଭୁଦତ୍ତ ପ୍ରଧାନ ସଙ୍ଗୀତ ନିର୍ଦ୍ଦେଶନା ଦେଇଥିଲେ । ୨୦୨୩ ମସିହାରେ କ୍ରିଷ୍ଣାଙ୍କୁ ଭାରତର ଚତୁର୍ଥ ସର୍ବୋଚ୍ଚ ବେସାମରିକ ସମ୍ମାନ ପଦ୍ମଶ୍ରୀରେ ପ୍ରଦାନ କରାଯାଇଥିଲା ।

କ୍ରିଷ୍ଣା ପଟେଲ
ଜନ୍ମ	(1957-11-28) ୨୮ ନଭେମ୍ବର ୧୯୫୭
ଜାତୀୟତା	ଭାରତୀୟ
ଜାତୀୟତା	ଭାରତୀୟ
ଉଲ୍ଲେଖନୀୟ କୃତି	ରଙ୍ଗବତୀ
ପିତାମାତା(s)	ଜନ୍ମେଜୟ ପଟେଲ, ସେହ୍ନଲତା ପଟେଲ
ପୁରସ୍କାର	ପଦ୍ମଶ୍ରୀ - ୨୦୨୩ ଓଡ଼ିଶା ସଙ୍ଗୀତ ନାଟକ ସମ୍ମାନ - ୨୦୧୩

ବ୍ୟକ୍ତିଗତ ଜୀବନୀ

କ୍ରିଷ୍ଣା ପଟେଲ ୧୯୫୭ ମସିହାରେ ଜନ୍ମଗ୍ରହଣ କରିଥିଲେ । ତାଙ୍କ ପିତାଙ୍କ ନାମ ଜନ୍ମେଜୟ ପଟେଲ ଓ ମାତାଙ୍କ ନାମ ସେହ୍ନଲତା ପଟେଲ । ତାଙ୍କ ପୈତୃକ ଘର ସମ୍ବଲପୁର ଜିଲ୍ଲାର କୁଚିଣ୍ଡା । ତାଙ୍କ ବାପା ଜଣେ ପୋଲିସ ଅଫିସର ଓ ମା’ ଗୃହିଣୀ ଥିଲେ । ମାତାଙ୍କର ସଙ୍ଗୀତରେ ରୁଚି ଥିଲା । ମାତାଙ୍କ ପ୍ରେରଣାରେ ସେ ସଙ୍ଗୀତ ଶିଖିବା ଆରମ୍ଭ କରିଥିଲେ । ସାତବର୍ଷ ବେଳୁ ସେ ଓଡ଼ିଶୀ, ଛାନ୍ଦ, ଚମ୍ପୂ ଶିକ୍ଷାଲାଭ କରିଥିଲେ । ଗାଁ ସ୍କୁଲରେ ପ୍ରାଥମିକ ଶିକ୍ଷାସାରି ସେ କୁଚିଣ୍ଡା ବାଳିକା ଉଚ୍ଚବିଦ୍ୟାଳୟରୁ ମେଟ୍ରିକ ପରୀକ୍ଷା ପାସ କରିଥିଲେ । ବରଗଡ଼ ପଞ୍ଚାୟତ କଲେଜରୁ ସେ କଳାରେ ସ୍ନାତକ ଶିକ୍ଷାଲାଭ କରିଥିଲେ ।

ଗୁରୁ ଫକୀର ମୋହନ ପଟ୍ଟନାୟକ, ପ୍ରଭୁଦତ୍ତ ପ୍ରଧାନ, ଶାସ୍ତ୍ରୀୟରେ ପ୍ରଦୀପ ପାତ୍ର, ଜ୍ଞାନରଞ୍ଜନ ମହାପାତ୍ର, ପ୍ରଫୁଲ ମିତ୍ର, ପ୍ରମୋଦ ମିଶ୍ର, ରତନ ପୂଜାରୀ ଏବଂ ସମ୍ବଲପୁର କଳାପରିଷଦରେ ଗୁରୁ ରଣଜିତ ଦାଶ, କୃପାସିନ୍ଧୁ ଗୁରୁ ଓ ଅରୁଣ ସେଠ ପ୍ରମୁଖଙ୍କଠାରୁ ସେ ସଂଗୀତ ଶିକ୍ଷା ଲାଭ କରିଥିଲେ ।

ସଙ୍ଗୀତ ଜୀବନ

କ୍ରିଷ୍ଣା ମୁଖ୍ୟତଃ ସମ୍ବଲପୁରୀ ଗୀତ ଗାଇଥାନ୍ତି । କିନ୍ତୁ ଆଧୁନିକ, କ୍ଲାସିକ ଓ ଭଜନ ମଧ୍ୟ ଗାଆନ୍ତି । ୧୯୭୭/୭୮ମସିହା ବେଳକୁ ରଙ୍ଗବତୀ ଗୀତକୁ ଆକାଶବାଣୀ ସମ୍ବଲପୁରକେନ୍ଦ୍ରରେ ଗାଇବାପାଇଁ ସୁଯୋଗ ମିଳିଥିଲା । ରସର କେଲି, ଲରୀ ମଟର, ଆହେ କଳାକାହ୍ନୁ ଓ ରସ ଜାମୁଡାଳିରେ ଆଦି ଶତାଧିକ ଗୀତ ସେ ଗାଇଛନ୍ତି । ଅସ୍ତରାଗ ଚଳଚ୍ଚିତ୍ରରେ ସେ ପ୍ରଚ୍ଛଦପଟ ଗାୟିକା ଭାବରେ କାମ କରିଛନ୍ତି ।

ଆକାଶବାଣୀ ସମ୍ବଲପୁର କେନ୍ଦ୍ରର ସେ ଜଣେ ଏ-ଗ୍ରେଡ଼ କଳାକାର ଓ ଲୋକଗୀତ କଣ୍ଠଶିଳ୍ପୀ ।

ସମ୍ମାନ ଓ ପୁରସ୍କାର

• ପଦ୍ମଶ୍ରୀ - ୨୦୨୩
• ଓଡ଼ିଶା ସଙ୍ଗୀତ ନାଟକ ସମ୍ମାନ - ୨୦୧୩
• ଡକ୍ଟରେଟ - ୨୦୧୫ (ଉତ୍କଳ ସଂସ୍କୃତି ବିଶ୍ୱବିଦ୍ୟାଳୟ)
• ଉତ୍କଳପ୍ରଜ୍ଞା (ଦୂରଦର୍ଶନ ଭୁବନେଶ୍ୱର)
• ଭାରତ ମସଲା ତରଫରୁ ପୁରସ୍କୃତ