ରବି ରାୟ
ରବି ରାୟ (୨୬ ନଭେମ୍ବର ୧୯୨୬ - ୬ ମାର୍ଚ୍ଚ ୨୦୧୭) ଓଡ଼ିଶାର ଜଣେ ଗାନ୍ଧୀବାଦୀ ସ୍ୱାଧୀନତା ସଂଗ୍ରାମୀ, ସମାଜସେବୀ ତଥା ଜନନେତା ଥିଲେ । ସେ କେନ୍ଦ୍ର ସରକାରରେ ସ୍ୱାସ୍ଥ୍ୟ ମନ୍ତ୍ରୀ ଏବଂ ନବମ ଲୋକ ସଭାର ବାଚସ୍ପତି ଦାୟିତ୍ୱ ମଧ୍ୟ ନିର୍ବାହ କରିଥିଲେ । ଲୋକ ସଭା ବାଚସ୍ପତି ପଦବୀକୁ ପହଂଚିବାରେ ସେ ଏକ ମାତ୍ର ଓଡ଼ିଆ ବ୍ୟକ୍ତି ।
ରବି ରାୟ | |
|---|---|
 | |
| ଜନ୍ମ | ୨୬ ନଭେମ୍ବର ୧୯୨୬ |
| ମୃତ୍ୟୁ | ୬ ମାର୍ଚ୍ଚ ୨୦୧୭ (ବୟସ ୯୦) |
| ଜାତୀୟତା | ଭାରତୀୟ |
| ଶିକ୍ଷା | ସ୍ନାତକ (ଆଇନ,ଇତିହାସ) |
| ଶିକ୍ଷାନୁଷ୍ଠାନ | ରେଭେନ୍ସା ମହାବିଦ୍ୟାଳୟ, ମଧୁସୂଦନ ଆଇନ ବିଦ୍ୟାଳୟ |
| ପ୍ରସିଦ୍ଧି | ରାଜନେତା,ସ୍ୱାଧୀନତା ସଂଗ୍ରାମୀ, ଲୋକ ସଭାର ବାଚସ୍ପତି ଓ ଭାରତର ସ୍ୱାସ୍ଥ୍ୟ ମନ୍ତ୍ରୀ |
| ବୈବାହିକ-ସାଥୀ | ସରସ୍ୱତୀ ସ୍ୱାଇଁ[୧] |
| ପୁରସ୍କାର | ଉତ୍କଳ ରତ୍ନ ସମ୍ମାନ, ୨୦୧୦ କଳିଙ୍ଗ ରତ୍ନ ୨୦୦୮ |
ବାଲ୍ୟବସ୍ଥା ଓ ଶିକ୍ଷା ସମ୍ପାଦନା
ରବି ରାୟ, ୧୯୨୬ ମସିହା ନଭେମ୍ବର ମାସ ୨୬ ତାରିଖରେ, ପୁରୀ ଜିଲ୍ଲାର ଭଁଅରାଗଡ଼ର ରାୟ ପରିବାରରେ ଜନ୍ମଗ୍ରହଣ କରିଥିଲେ । ଛାତ୍ରାବସ୍ଥାରୁ ସେ ସ୍ପଷ୍ଟବାଦୀ ଓ ନିର୍ଭୀକ ଥିଲେ । ସେ କଟକର ରେଭେନ୍ସା ମହାବିଦ୍ୟାଳୟରୁ ଇତିହାସ ଓ ମଧୁସୂଦନ ଆଇନ ବିଦ୍ୟାଳୟରୁ ଆଇନରେ ସ୍ନାତକ ଲାଭ କରିଥିଲେ ।
ରାଜନୈତିକ ଜୀବନ ସମ୍ପାଦନା
ରାମମନୋହର ଲୋହିଆଙ୍କ ଆଦର୍ଶରେ ଅନୁପ୍ରାଣିତ ହୋଇ ସେ, ଛାତ୍ରାବସ୍ଥାରୁ ଛାତ୍ର ରାଜନୀତି ସହିତ ଜଡ଼ିତ ରହିଥିଲେ ଓ ପରବର୍ତ୍ତୀ ସମୟରେ ପ୍ରତ୍ୟକ୍ଷ ରାଜନୀତିରେ ସାମିଲ ହୋଇଥିଲେ । ୧୯୪୮ ମସିହାରେ ସେ ସୋସିଆଲିଷ୍ଟ ପାର୍ଟିରେ ଯୋଗଦାନ କରିଥିଲେ । ପରବର୍ତ୍ତୀ ସମୟରେ ସେ ସଂଯୁକ୍ତ ସୋସିଆଲିଷ୍ଟ ପାର୍ଟି, ଜନତା ଦଳ ଏବଂ ଜନତା ଦଳ(ଏସ) ସହିତ ଜଡ଼ିତ ରହିଆସିଛନ୍ତି ।
ସ୍ୱାଧୀନତା ଆନ୍ଦୋଳନ ସମୟରେ, ମହାତ୍ମା ଗାନ୍ଧୀଙ୍କ ଗ୍ରାମ ସ୍ୱରାଜ କାର୍ଯ୍ୟକ୍ରମ ପ୍ରତି ଆକୃଷ୍ଟ ହୋଇ ସେ ଅହିଂସ ସମାଜବାଦ ତତ୍ତ୍ୱର ପ୍ରବକ୍ତା ସାଜିଥିଲେ ।
ତାଙ୍କ ରାଜନୈତିକ ଜୀବନର ମୂଳଦୁଆ ପଡିଥିଲା ଯେତେବେଳେ ସେ ରେଭେନ୍ସା କଲେଜ ଛାତ୍ର ୟୁନିୟନର ସଭାପତି ରୂପେ ୧୯୪୮-୪୯ ଶିକ୍ଷା ବର୍ଷରେ ନିର୍ବାଚିତ ହୋଇଥିଲେ । ପରେ ପରେ ସେ ମଧୁସୂଦନ ଆଇନ ମହାବିଦ୍ୟାଳୟ ଛତ୍ର ସଂଘର ପ୍ରଥମ ସଭାପତି ଭାବରେ ୧୯୪୯-୫୦ ମସିହାରେ ନିର୍ବାଚିତ ହୋଇଥିଲେ[୨] ।
୧୯୬୭ ମସିହାରେ ଅନୁଷ୍ଠିତ ହୋଇଥିବା ଚତୁର୍ଥ ଲୋକ ସଭା ନିର୍ବାଚନରେ ସେ ପୁରୀ ଆସନରୁ ବିଜୟୀ ହୋଇଥିଲେ । ସେ ସେତେବେଳେ ସଂଯୁକ୍ତ ସୋସିଆଲିଷ୍ଟ ପାର୍ଟିର ସଦସ୍ୟ ଥିଲେ । ୧୯୭୪ ଏପ୍ରିଲ ମାସରୁ ୧୯୮୦ ମସିହା ଏପ୍ରିଲ ମାସ ପର୍ଯ୍ୟଂତ ସେ ରାଜ୍ୟସଭାରେ ସେ ଲୋକ ଦଳ ତରଫରୁ ସଦସ୍ୟ ହୋଇଥିଲେ[୩] ।
୧୯୮୯ ମସିହାରେ ସେ କେନ୍ଦ୍ରାପଡ଼ା ଲୋକ ସଭା ନିର୍ବାଚନ ମଣ୍ଡଳୀରୁ ନବମ ଲୋକ ସଭାକୁ ନିର୍ବାଚିତ ହୋଇଥିଲେ ଓ ୧୯୯୧ ମସିହାରେ ସର୍ବସମ୍ମତି କ୍ରମେ ନବମ ଲୋକ ସଭାର ବାଚସ୍ପତି ନିର୍ବାଚିତ ହୋଇଥିଲେ । [୪] ବାଚସ୍ପତି ଭାବରେ, ସେ ନିରପେକ୍ଷତା ଓ ନ୍ୟାୟପରତାର ଉଦାହରଣ ସାଜିଛନ୍ତି । ଦଶମ ଲୋକ ସଭାକୁ ସେ କେନ୍ଦ୍ରାପଡ଼ା ନିର୍ବାଚନ ମଣ୍ଡଳୀରୁ ପୁନଃ ନିର୍ବାଚିତ ହୋଇଥିଲେ । ୧୯୯୭ ମସିହାରୁ ସେ 'ଲୋକଶକ୍ତି ଅଭିଯାନ' ନାମରେ ଏକ ଅଣରାଜନୈତିକ ଅନୁଷ୍ଠାନ ସହ ଜଡ଼ିତ ଥିଲେ । ତିବ୍ୱତ ମୁକ୍ତି ଆନ୍ଦୋଳନକୁ ସେ ପୂର୍ଣ ସମର୍ଥନ ଦେଇଆସିଥିଲେ ଓ ଅନେକ ତିବ୍ୱତୀୟ ନେତାଙ୍କର ଅନ୍ତରଙ୍ଗ ସହଯୋଗୀ ହୋଇପାରିଥିଲେ ।
ଲୋକ ସଭା ବାଚସ୍ପତି ସମ୍ପାଦନା
୧୯୮୯ ମସିହାରେ ସେ କେନ୍ଦ୍ରାପଡ଼ାରୁ ଲୋକ ସଭାକୁ ନିର୍ବାଚିତ ହୋଇ, ବାଚସ୍ପତି ପଦବୀ ମଣ୍ଡନ କରିଥିଲେ । ସେ ଲୋକ ସଭାରେ "ଶୂନ୍ୟକାଳ" ବ୍ୟବସ୍ଥା ଆରମ୍ଭ କରିଥିଲେ । ତାଙ୍କରି ସମୟରୁ ଦୂରଦର୍ଶନରେ ଲୋକ ସଭା ଅଧିବେଶନର ସିଧା ପ୍ରସାରଣ ଆରମ୍ଭ ହୋଇଥିଲା । "ଆଣ୍ଟି ଡେଫେକ୍ସନ ଲ" ମାଧ୍ୟମରେ ସେ ଛଅ ଜଣ ସାଂସଦଙ୍କୁ ବହିଷ୍କାର କରିଥିଲେ ।
ସାହିତ୍ୟ ସର୍ଜନା ସମ୍ପାଦନା
ଜଣେ ଲେଖକ, ସ୍ତମ୍ଭକାର ଓ ସମ୍ପାଦକ ଭାବରେ ରବିରାୟଙ୍କର ପରିଚିତି ରହିଛି ।
ରଚିତ ପୁସ୍ତକ ସମ୍ପାଦନା
- ମାଟିରୁ ଆକାଶ(ଆତ୍ମଜୀବନୀ)[୫]
- ପାର୍ଲାମେଣ୍ଟାରୀ ଡେମୋକ୍ରେସି(ଇଂରାଜୀ ପୁସ୍ତକ)
ସମ୍ପାଦନା ସମ୍ପାଦନା
- ଚୌଖମ୍ବା(ହିନ୍ଦୀ ପତ୍ରିକା)
- ଜନ(ଓଡ଼ିଆ ପତ୍ରିକା)
- ସମତା(ଓଡ଼ିଆ ପତ୍ରିକା)
- ଦ ଅଦର ସାଇଡ଼(ଇଂରାଜୀପତ୍ରିକା)
ସମ୍ମାନ ଓ ପୁରସ୍କାର ସମ୍ପାଦନା
- ଉତ୍କଳ ରତ୍ନ
- କଳିଙ୍ଗ ରତ୍ନ(ସାରଳା ସାହିତ୍ୟ ସଂସଦଦ୍ୱାରା ପ୍ରଦତ୍ତ)
- ଲାଇଟ ଅଫ ଟ୍ରୁଥ(ଦଲାଇଲାମାଙ୍କଦ୍ୱାରା ପ୍ରଦତ୍ତ)[୬]
ଆଧାର ସମ୍ପାଦନା
- ↑ "ପ୍ରଫେସର ସରସ୍ୱତୀ ସ୍ୱାଇଁଙ୍କ ପରଲୋକ". No. ଧରିତ୍ରୀ ୧୬/୦୧/୨୦୨୦ ପୃଷ୍ଠା ୫. ଧରିତ୍ରୀ. Retrieved 16 January 2020.
- ↑ "ଆର୍କାଇଭ୍ କପି". Archived from the original on 2011-07-19. Retrieved 2013-06-04.
{{cite web}}: Cite has empty unknown parameter:|1=(help) - ↑ "List of Rajya Sabha members from Odisha". Retrieved 6 April 2017.
{{cite web}}:|first=missing|last=(help) - ↑ Rabi Ray (1991). Parliamentary diplomacy. S. Chand & Co. Retrieved 4 June 2013.
- ↑ "ଆର୍କାଇଭ୍ କପି". Archived from the original on 2011-07-19. Retrieved 2013-06-04.
{{cite web}}: Cite has empty unknown parameter:|1=(help) - ↑ "ଆଜି ଜନ୍ମଦିନ". No. ସମ୍ବାଦ ୨୬/୧୧/୨୦୧୯ ଭୁବନେଶ୍ୱର ସଂସ୍କରଣ ପୃଷ୍ଠା ୨. ସମ୍ବାଦ. Retrieved 26 November 2019.