ମାଟିର ମଣିଷ (ଉପନ୍ୟାସ)
ମାଟିର ମଣିଷ, କାଳିନ୍ଦୀ ଚରଣ ପାଣିଗ୍ରାହୀଙ୍କ ରଚିତ ଏକ ଉପନ୍ୟାସ ଅଟେ ।[୧] ୧୯୩୧ ମସିହାରେ ଏହି ଉପନ୍ୟାସଟିର ପ୍ରଥମ ମୁଦ୍ରଣ କରାଯାଇଥିଲା ଏବଂ ୧୯୭୬ ସୁଦ୍ଧା ଏହା ବତିଶ ଥର ମୁଦ୍ରିତ ହୋଇଥିଲା । ୧୯୭୬ ପରଠାରୁ ଦୀର୍ଘ ତିନି ଦଶନ୍ଧି ଧରି ଏହାର ପୁନଃମୁଦ୍ରଣ ହୋଇପାରିନଥିଲା । ପରେ ୨୦୦୪ ମସିହାରେ କାଳିନ୍ଦୀଚରଣଙ୍କ ପୁତ୍ର ତୁଷାରରଞ୍ଜନ ପାଣିଗ୍ରାହୀଙ୍କ ଅନୁମତି କ୍ରମେ ପୁଣି ଥରେ ଏହାର ଏକ ସଚିତ୍ର ସଂସ୍କରଣ ପ୍ରକାଶିତ ହୋଇଥିଲା ।[୨] ମାଟିର ମଣିଷ ଉପନ୍ୟାସରେ ସିଲହୋଏଟ୍ ଧରଣର ଚିତ୍ର ସ୍ଥାନ ପାଇଛି (ଏହି ଧରଣର ଛବିରେ ରଙ୍ଗ ବା ବସ୍ତୁର ବହୁଳତା ନଥାଏ) । ମାଟିର ମଣିଷ ଉପନ୍ୟାସ ପାଇଁ ଗୋପାଳ ଚରଣ କାନୁନ୍ଗୋ ଏହି ଚିତ୍ର ଗୁଡ଼ିକ ଆଙ୍କିଥିଲେ ।[୩] ୧୯୫୯ ସଂସ୍କରଣ ସମୟରେ ଏହି ଉପନ୍ୟାସର ମୂଲ୍ୟ ମାତ୍ର ଏକ ଟଙ୍କା ଚାରି ଅଣା ବା ୧.୨୫ ନୂଆପଇସା ଥିଲା । ସେତେବେଳେ ଏହା ଓଡ଼ିଶା ମାଧ୍ୟମିକ ଶିକ୍ଷା ପରିଷଦଦ୍ୱାରା ଅଷ୍ଟମ ଶ୍ରେଣୀର ଅତିରିକ୍ତ ସାହିତ୍ୟ ରୂପେ ଅନୁମୋଦିତ ହୋଇଥିଲା ।[୪]
| ମାଟିର ମଣିଷ | |
|---|---|
| ଲେଖକ | କାଳିନ୍ଦୀ ଚରଣ ପାଣିଗ୍ରାହୀ |
| ଚିତ୍ରକର | ଗୋପାଳ ଚରଣ କାନୁନ୍ଗୋ |
| ମଲାଟ ଚିତ୍ରକର | ଗୋପାଳ ଚରଣ କାନୁନ୍ଗୋ |
| ଦେଶ | ଭାରତ |
| ଭାଷା | ଓଡ଼ିଆ |
| ବିଷୟ | ଗ୍ରାମ୍ୟ ଜୀବନ, ପାରିବାରିକ କଳହ |
| ବିଭାଗ | ଉପନ୍ୟାସ |
| ପ୍ରକାଶକ | ଲାର୍କ ବୁକ୍ସ (୨୦୦୪ ମସିହା ସଂସ୍କରଣ), ନିଉ ଷ୍ଟୁଡେଣ୍ଟସ୍ ଷ୍ଟୋର୍ସ ପ୍ରା:ଲି:, ବ୍ରହ୍ମପୁର (୧୯୫୯ ମସିହା ସଂସ୍କରଣ) |
| ପ୍ରକାଶ ତାରିଖ | ୧୯୩୧ - ୧୯୭୬, ୨୦୦୪ |
| ମାଧ୍ୟମ ପ୍ରକାର | କାଗଜ ମଲାଟ |
| ପୃଷ୍ଠା | ୧୧୮ (୨୦୦୪ ମସିହା ସଂସ୍କରଣ), ୧୫୭ (୧୯୫୯ ମସିହା ସଂସ୍କରଣ) |
| ISBN | 81-7375-126-9 |
ମାଟିର ମଣିଷ ଉପନ୍ୟାସ ବିଷୟରେ କହିବାପାଇଁ ଯାଇ ଉପନ୍ୟାସର ଉତ୍ସର୍ଗ ପୃଷ୍ଠାରେ କାଳିନ୍ଦୀ ଚରଣ ଲେଖିଛନ୍ତି:
ଦୁନିଆର ହାଟେ କୋଟି ହୀରା ନୀଳା ମଣି-ମାଣିକର ତୁଲ,
ମାଟିର ପିତୁଳା ଗଢ଼ି ରଖିଦେଲି କିଏ ପଚାରିବ ମୂଲ !
ଏହି ଉପନ୍ୟାସ ଆଧାରରେ ୧୯୬୬ ମସିହାରେ "ମାଟିର ମଣିଷ" ନାମକ ଏକ କଥାଚିତ୍ର ନିର୍ମାଣ କରାଯାଇଥିଲା ଏବଂ ମୃଣାଳ ସେନ ଏହାର ନିର୍ଦ୍ଦେଶନା ଦେଇଥିଲେ ।[୫]
ବଂଶାବଳୀ ଓ ଚରିତ୍ର
ସମ୍ପାଦନାଶାମ ପଧାନର ଦୁଇପୁଅ, ବରଜୁ ବଡ଼ ଓ ଛକଡ଼ି ସାନ । ବରଜୁର ତିନି ଝିଅ ଗୋଟିଏ ପୁଅ ।
| ଶାମ ପଧାନ | ପଧାନ ବୁଢ଼ୀ | ||||||||||||||||||||||||||||||||||||||||||||
| ନେତ୍ରମଣି | ଛକଡ଼ି (ସାନ) | ବରଜୁ (ବଡ଼) | ହାରାବୋଉ | ||||||||||||||||||||||||||||||||||||||||||
| ହାରା (ଝିଅ-୧ମ) | ସୁନା (ଝିଅ-୨ୟ) | ମୋତି (ଝିଅ-୩ୟ) | ଦାମ (ପୁଅ-୪ର୍ଥ) | ||||||||||||||||||||||||||||||||||||||||||
ଉପନ୍ୟାସରେ ବର୍ଣ୍ଣିତ ଅନ୍ୟାନ୍ୟ ପ୍ରମୁଖ ଚରିତ୍ର ସବୁ ହେଲେ:
- ହରି ମିଶ୍ର
- ଚନ୍ଦରା ଶିଅଳ
- ଧରମୁ ଦାସ (ଧରମା)
- ଶାରଦୀ ବୋଉ
- ଗୌରାଙ୍ଗ ଶେଣ (ଗଉରା)... ଇତ୍ୟାଦି
ସଂକ୍ଷିପ୍ତ କାହାଣୀ
ସମ୍ପାଦନାଶ୍ୟାମ ପ୍ରଧାନଙ୍କର ଦୁଇ ପୁଅ ବରଜୁ ଓ ଛକଡ଼ି । ବରଜୁ ବିବାହିତ, ୪ଟି ସନ୍ତାନ-ସନ୍ତତିର ପିତା, ଦାୟିତ୍ୱବାନ, କିନ୍ତୁ ଛକଡ଼ି ଫୁଲାଫାଙ୍କିଆ । ଛକଡ଼ିର ବିବାହ ନେତ୍ରମଣି ସହିତ ହୋଇଥିଲା କିନ୍ତୁ ସେମାନଙ୍କର କିଛି ସନ୍ତାନ ସନ୍ତତି ନଥିଲେ । ପଧାନ ବୁଢ଼ା ଓ ବୁଢ଼ୀର ମୃତ୍ୟୁ ପରେ ଦୁଇ ଜାଆଙ୍କ ମଧ୍ୟରେ ଭୁଲ୍ ବୁଝାମଣା ଦୁଇ ଭାଇଙ୍କ ମଧ୍ୟରେ ଭୁଲ୍ ବୁଝାମଣା ସୃଷ୍ଟି କଲା । ମାମଲତକାର ହରି ମିଶ୍ର ମଧ୍ୟ ଛକଡ଼ିକୁ ଭାଇଠାରୁ ଅଲଗା ହେବା ପାଇଁ ଉସୁକାଇଥିଲେ, କାରଣ ବରଜୁର ଗାଁ ଭଲମନ୍ଦରେ ନିଷ୍ପତ୍ତି ଯୋଗୁଁ ତାଙ୍କର ମାମଲାତକାରୀ ବ୍ୟବସାୟ ବାଧାପ୍ରାପ୍ତ ହେଉଥିଲା । ନେତ୍ରମଣି ବି ଛକଡ଼ିକୁ ଭିନ୍ନେ ହାଣ୍ଡି କରିବାପାଇଁ ଖୁଣ୍ଟା ଦେଉଥିଲେ । ଛକଡ଼ି କିନ୍ତୁ ବରଜୁକୁ ଏକଥା କହିବା ପାଇଁ ଡରୁଥିଲା । ପଧାନ ବୁଢ଼ା ମଲା ବେଳେ ବରଜୁକୁ କହିଯାଇଥିଲା, ଭିନ୍ନେ ନହେବାପାଇଁ, ଘରେ ପାଚେରି ନଉଠେଇବା ପାଇଁ । ବରଜୁ ବହୁକଷ୍ଟରେ ହାରାବୋଉକୁ (ତା' ସ୍ତ୍ରୀ)କୁ ଝଗଡା ନକରିବାପାଇଁ ବୁଝେଇବାରେ ସକ୍ଷମ ହୋଇଥିଲେ ବି ନେତ୍ରମଣି ଅଲଗା ହେବାପାଇଁ ଜିଦ ଧରିଥିଲା । ଛକଡ଼ି, ହରି ମିଶ୍ରର ସାହାଯ୍ୟ ନେଇ ଭିନ୍ନେ ହେବା ପାଇଁ ବାହାରିଲା । ଶେଷରେ ବରଜୁ, ଛକଡ଼ିକୁ ସବୁ ସମ୍ପତିର ମାଲିକାନା ଦେଇ ନିଜ ସ୍ତ୍ରୀ ପିଲାଙ୍କୁ ନେଇ ଗାଁଆ ଛାଡ଼ି ଚାଲିଗଲା । ଉପନ୍ୟାସ ଶେଷରେ ଛକଡ଼ି ପୁରୁଣା ଦିନ ସବୁକୁ ଝୁରିଛି ଓ ବରଜୁ ସହ ଯିବା ପାଇଁ ବାହାରିଛି ।[୬]
ଆଧାର
ସମ୍ପାଦନା- ↑ "MATIRA MANISA NOVEL BY KALANDI CHARANA PANIGRAHI". incredibleorissa.com. Retrieved 6 July 2016.
- ↑ ମାଟିର ମଣିଷ, ୨୦୦୪ ସଂସ୍କରଣ, 'ବ୍ୟଥା ଓ ଆନନ୍ଦର ବାର୍ତ୍ତା'
- ↑ ମାଟିର ମଣିଷ, ୨୦୦୪ ସଂସ୍କରଣ ଓ ୧୯୫୯ ସଂସ୍କରଣ, 'ଛବି କଥା'
- ↑ ମାଟିର ମଣିଷ, ୧୯୫୯ ସଂସ୍କରଣ, 'ଭିତର ମଲାଟ'
- ↑ "Matira Manisha (Two Brothers)". mrinalsen.org/. Retrieved 8 July 2016.
- ↑ Jitendra Narayan Patnaik. "Four Major Modern Oriya Novelists" (PDF). Orissar Review (Nov 2008). Retrieved 8 July 2016.
ଅଧିକ ତଥ୍ୟ
ସମ୍ପାଦନା- OaOb ସାଇଟ୍ରୁ ମାଟିର ମଣିଷ ଡାଉନଲୋଡ କରିପାରିବେ । ଓଡ଼ିଆ ବୁକ ଡାଉନଲୋଡ଼ କରିପାରିବେ ।
- "ମାଟିର ମଣିଷ କାଳିନ୍ଦୀ ଚରଣଙ୍କ ଜୟନ୍ତୀ ଉତ୍ସବ". ଓଡ଼ିଶାନ୍. Retrieved 6 July 2016.