ନଟବର ସେଣ

ନଟବର ସେଣ ଜଣେ ଭାରତୀୟ ଓଡ଼ିଆ-ଭାଷୀ ଅଭିନେତା ତଥା ନିର୍ଦ୍ଦେଶକ ଥିଲେ । ସେ ମନୀଷା, ସାଧନା, ଯୌବନ, ଓ ଆପଣ କୁହନ୍ତୁ ଆଦି ନାଟକ ପରିବେଷଣ ନିମନ୍ତେ ଜଣାଶୁଣା ଥିଲେ । ୧୯୮୦ରେ ମୁକ୍ତିଲାଭ କରିଥିବା ମେଘମୁକ୍ତି କଥାଚିତ୍ରରେ ମଧ୍ୟ ସେ ଅଭିନୟ କରିଥିଲେ ।

ବୃତ୍ତିଗତ ଜୀବନ

କର୍ଣ୍ଣବଧ

ନଟବର ସେଣ ୧୯୩୩ ମସିହାରେ ପ୍ରଥମେ ନାଟକରେ ଅଭିନୟ ଆରମ୍ଭ କରିଥିଲେ । ସେହି ବର୍ଷ ରଜ ସଂକ୍ରାନ୍ତିରେ ଖୋର୍ଦ୍ଧା ଜିଲ୍ଲା ବାଲୁଗାଁ ନିକଟବର୍ତ୍ତୀ ଲମ୍ବୋଦରପୁର ଗ୍ରାମକୁ କଟକ ହରିହରପୁର ଯାତ୍ରାଦଳ ଆସି କର୍ଣ୍ଣବଧ ଗୀତାଭିନାୟ ରାତି ସାରା ମଂଚସ୍ଥ କରିଥିଲେ । ବର୍ଷର ବିଭିନ୍ନ ସମୟରେ ଯାତ୍ରାଭିନୟ ଦେଖି ଆଞ୍ଚଳିକ ଯୁବକମାନେ ଅନୁରୂପ ଏକ ଯାତ୍ରାଦଳର ପ୍ରସ୍ତୁତି ପାଇଁ ପ୍ରସ୍ତୁତି ଆରମ୍ଭ କରିଥିଲେ । ଖଣ୍ଡୁଆଳକୋଟ ବ୍ରାହ୍ମଣ ଶାସନର ଦୁଇ ଦୁର୍ଲଭ ଯୁବକ ଚକ୍ରପାଣି ଦାଶ ଓ ଲିଙ୍ଗରାଜ ନନ୍ଦ ନିଜ ଗ୍ରାମ ବ୍ରାହ୍ମଣ ଶାସନରେ ଯାତ୍ରା ତାମସା କରିବା ଅସମ୍ଭବ ବୋଲି ମନେକରି ନିକଟସ୍ଥ ଲମ୍ବୋଦରପୁର ଖଣ୍ଡାୟତ ଗ୍ରାମରେ ଯାତ୍ରା ପାଇଁ ଯୋଜନା କରିଥିଲେ । ସେଠାକାର ଗ୍ରାମବାସୀଙ୍କୁ ରାଜି କରାଇ ସେ ଦୁହେଁ ପ୍ରତ୍ୟେକଙ୍କ ଘରୁ ଜଣେ ଯାତ୍ରାଦଳରେ ଅଣାଇଥିଲେ । ସେମାନଙ୍କର ସହ ବିଶ୍ୱନାଥ କଳାପାହାଡ଼, ନଟବର ବିଶ୍ୱାଳ, ରଘୁନାଥ ସେଣ, ନଟବର ସେଣ, ବୃନ୍ଦାବନ ରାଉତରାୟ, ଗୋଦାବରୀ ଜେନା, ବତ୍ସ ରାଉତରାୟ, ବଟକୃଷ୍ଣ ସେଣ, ଧ୍ୟାନ ସେଣ ଓ ମହନ୍ତ ସିଂ ପ୍ରମୁଖ ଯୋଗଦେଇଥିଲେ । ଅଭିନୟ ପାଇଁ ପ୍ରସ୍ତୁତ ଥିବାବେଳେ ଯାତ୍ରାଦଳକୁ ଉଦୟ ନାଥ ବିଶ୍ୱାଳ ଓ ହରିହର ବିଶ୍ୱାଳ ପାଣ୍ଠି ଯୋଗାଇଥିଲେ । ଚକ୍ରପାଣି ଦାଶଙ୍କ ନିର୍ଦ୍ଦେଶନା ଓ ଲିଙ୍ଗରାଜ ନନ୍ଦଙ୍କ ସଙ୍ଗୀତରେ କର୍ଣ୍ଣବଧ ଗୀତାଭିନୟ ପ୍ରସ୍ତୁତ ହୋଇଥିଲା ।