ଶୈଳରାଣୀ ମିଶ୍ର

ଶୈଳରାଣୀ ମିଶ୍ର(ଜନ୍ମ : ୧୯୩୨) ଜଣେ ଓଡ଼ିଆ ସାହିତ୍ୟିକା ଓ ସମ୍ପାଦିକା । ସେ "ସମାରୋହ" ପତ୍ରିକାର ସମ୍ପାଦନା କରିଥାନ୍ତି ।

ଶୈଳରାଣୀ ମିଶ୍ର
ଜନ୍ମ	୧୯୩୨ ନରଣପୁର, ପୁରୀ ଜିଲ୍ଲା
ପ୍ରସିଦ୍ଧି	ସମ୍ପାଦିକା
ବୈବାହିକ-ସାଥୀ	ଦୁର୍ଗାମାଧବ ମିଶ୍ର

ପାରିବାରିକ ଜୀବନ

ଶୈଳରାଣୀ ୧୯୩୨ ମସିହାରେ ପୁରୀ ଜିଲ୍ଲା ନରଣପୁର ଗ୍ରାମର ଏକ ନୈଷ୍ଠିକ ବ୍ରାହ୍ମଣ ପରିବାରରେ ଜନ୍ମଗ୍ରହଣ କରିଥିଲେ । ତାଙ୍କର ବାପା ସରକାରୀ ଚାକିରିଆ ଥିଲେ । ସେମାନେ ଗୋଟିଏ ଭାଇ ଓ ତିନି ଭଉଣୀ । ତାଙ୍କର ବିବାହ ୧୯୫୦ ମସିହାରେ ନୟାଗଡ଼ ଅଞ୍ଚଳର ଦୁର୍ଗାମାଧବ ମିଶ୍ରଙ୍କ ସହିତ ହୋଇଥିଲା । ସେତେବେଳେ ସେ ୧୭ ବର୍ଷ ବୟସର ହୋଇଥିଲେ ଏବଂ ସପ୍ତମ ପଢ଼ା ସଂପୂର୍ଣ୍ଣ କରି ନ ଥିଲେ । ବଡ଼ ପୁଅ ଜନ୍ମ ହେବା ପରେ ସେ ୧୯୬୯ ମସିହାରେ ମାଟ୍ରିକ୍ ପାସ୍ କରିଥିଲେ । ତାପରେ ସେ ଶୈଳବାଳା ମହିଳା ମହାବିଦ୍ୟାଳୟରୁ ବିଏ ପାସ୍ କରିଥିଲେ । ସେ ଗଳ୍ପ, ଅନୁବାଦ ଗଳ୍ପ, ଭ୍ରମଣ କାହାଣୀ, ଶିଶୁ ସାହିତ୍ୟ, କବିତା ଓ ନାଟକ କ୍ଷେତ୍ରରେ ମଧ୍ୟ ନିଜର ସୃଜନ ସ୍ୱାକ୍ଷର ସୃଷ୍ଟି କରିଛନ୍ତି । ତାଙ୍କର ଦୁଇ ପୁଅ ଓ ଗୋଟିଏ ଝିଅ ।

ରଚନାବଳୀ

ପ୍ରଜାତନ୍ତ୍ରରେ ଶୈଳରାଣୀଙ୍କର ଗଳ୍ପ "ଶୈଳ ଭାଜି ପଡ଼େ" ପ୍ରକାଶ ପାଇଥିଲା । ସେହି ଗଳ୍ପରେ ଆମ ସମାଜରେ ପ୍ରଚଳିତ କୁଶିକ୍ଷା, ଅନ୍ଧବିଶ୍ୱାସ, ନ୍ୟୁନ ମନୋଭାବ ଓ ପାତରଅନ୍ତର ବିରୁଦ୍ଧରେ ସ୍ୱର ଉତ୍ତୋଳନ କରିଥିଲେ । ଯାହା ଅନେକ ଗୁରୁଜନ ଶ୍ରେଣୀର ବ୍ୟକ୍ତିଙ୍କଠାରେ ଭ୍ରୂକୁଞ୍ଚନର କାରଣ ହୋଇଥିଲା । ତାଙ୍କ ସାହସକୁ ଦେଖି ଅନେକ ଆଶ୍ଚର୍ଯ୍ୟ ହୋଇଥିଲେ । ତାଙ୍କ ଲେଖା ମାଧ୍ୟମରେ ସୁସ୍ଥ ସାମାଜିକତା ଓ ସଂସ୍କାରକୁ ଅଗ୍ରାଧିକାର ଦେବା ପାଇଁ ଚାହିଁଥିଲେ। ତାଙ୍କ ରଚିତ ପୁସ୍ତକଗୁଡ଼ିକ ହେଲା :

ଗଳ୍ପ:

• ଯୁଥଭ୍ରଷ୍ଟ
• ବିବର୍ତ୍ତିତ
• ପୃଥିବୀ ଓ ଚକ୍ରବ୍ୟୂହ

ଅନୁବାଦ ଗଳ୍ପ

• ସୁବର୍ଣ୍ଣଲତା
• ଗଳିକନ୍ଦିର ଖେଳ
• ଉପଦେଶ ସାର
• ଯୋଗବଶିଷ୍ଠର କାହାଣୀ

ଭ୍ରମଣ କାହାଣୀ

• ଅମୃତ ଅନ୍ୱେଷଣ 

ଶିଶୁ ସାହିତ୍ୟ

• ଆଠ ସାତ ପନ୍ଦର

ସମ୍ପାଦନା

ଦିବ୍ୟଜୀବନ ସଂଘର ପଲ୍ଲବ ଓ ଦିବ୍ୟସନ୍ଦେଶର ସଂପାଦନା କରିଛନ୍ତି । ସମାରୋହ ସାହିତ୍ୟ ପତ୍ରିକାର ମଧ୍ୟ ସଂପାଦନା  କରିଛନ୍ତି ।

ପୁରସ୍କାର

• ୧୯୯୭ ମସିହାରେ ଓଡ଼ିଶା ସାହିତ୍ୟ ଏକାଡେମିଦ୍ୱାରା ସମ୍ବର୍ଦ୍ଧିତ
• ୨୦୧୩ ମସିହାରେ ସେ ଓଡ଼ିଶା ଲେଖିକା ସଂସଦ ସମ୍ମାନ
• ଫଲ୍ଗୁଧାରା ସମ୍ମାନ
• ଚିରସମର୍ଥା ସମ୍ମାନ
• କାଦମ୍ବିନୀ ସଂପାଦିକା ସମ୍ମାନ

ଦିବ୍ୟଜୀବନ ସଂଘ ଆନୁକୁଲ୍ୟରେ ଛୋଟ ପିଲାମାନଙ୍କୁ ପାଠ ପଢ଼ାଇବାଠାରୁ ଆରମ୍ଭ କରି ଔଷଧ ବଣ୍ଟନ ଓ ବୃଦ୍ଧାଶ୍ରମ ଯାଏ ସ୍ୱେଚ୍ଛାସେବୀ ଅନୁଷ୍ଠାନ ରହିଛି, ଏ ସବୁଥିରେ ଶୈଳରାଣୀ ଅଂଶଗ୍ରହଣ କରନ୍ତି ।