ପରବୀନ ସୁଲତାନା ଦିତି

ପରବୀନ ସୁଲତାନା ଦିତି (ବଙ୍ଗଳା: পারভীন সুলতানা ୩୧ ମାର୍ଚ୍ଚ ୧୯୬୫ – ୨୦ ମାର୍ଚ୍ଚ ୨୦୧୬) ଜଣେ ବଙ୍ଗଳାଦେଶୀ ଅଭିନେତ୍ରୀ, ଯିଏକି ଦିତି ନାମରେ ପରିଚିତା ଥିଲେ । ସେ ମୁଖ୍ୟତଃ ବଙ୍ଗଳାଦେଶୀ କଥାଚିତ୍ର ଏବଂ ଦୂରଦର୍ଶନରେ ଅଭିନୟ କରିଥିଲେ । ୧୯୮୭ ମସିହାରେ ସ୍ୱାମୀ ସ୍ତ୍ରୀ କଥାଚିତ୍ର ପାଇଁ ତାଙ୍କୁ ସହ-ଅଭିନେତ୍ରୀ ଭାବରେ ବଙ୍ଗଳାଦେଶର ଜାତୀୟ ଚଳଚ୍ଚିତ୍ର ପୁରସ୍କାର ମିଳିଥିଲା । ସେ ତାଙ୍କର ଅଭିନୟ ଜୀବନ ଭିତରେ ୨୦୦ରୁ ଅଧିକ ଚଳଚ୍ଚିତ୍ରରେ କାମ କରିଥିଲେ ।

ପରବୀନ ସୁଲତାନା ଦିତି
পারভীন সুলতানা দিতি
ଜନ୍ମ	ପରବୀନ ସୁଲତାନା (1965-03-31)୩୧ ମାର୍ଚ୍ଚ ୧୯୬୫ ସାନରଗାଁ, ନାରାୟଣଗଞ୍ଜ ଜିଲ୍ଲା, ପୂର୍ବ ପାକିସ୍ତାନ
ମୃତ୍ୟୁ	୨୦ ମାର୍ଚ୍ଚ ୨୦୧୬(2016-03-20) (ବୟସ ୫୦) ଢାକା, ବଙ୍ଗଳାଦେଶ
ସାନରଗାଁ, ନାରାୟଣଗଞ୍ଜ, ବଙ୍ଗଳାଦେଶ
ଜାତୀୟତା	ବଙ୍ଗଳାଦେଶୀ
ବୃତ୍ତି	ଅଭିନେତ୍ରୀ
ବୈବାହିକ-ସାଥୀ(s)	ସୋହେଲ ଚୌଧୁରୀ (ଛାଡ଼ପତ୍ର) ଇଲିଆସ କଞ୍ଚନ (ଛାଡ଼ପତ୍ର)
ପୁରସ୍କାର	ବଙ୍ଗଳାଦେଶୀ ଜାତୀୟ ଚଳଚ୍ଚିତ୍ର ପୁରସ୍କାର

ପ୍ରାରମ୍ଭିକ ଜୀବନ ଏବଂ ଶିକ୍ଷା

ପରବୀନ ସୁଲତାନା ଦିତି ବଙ୍ଗଳାଦେଶର ନାରାୟଣଗଞ୍ଜ ଜିଲ୍ଲାର ସାନରଗାଁଠାରେ ୩୫ ମାର୍ଚ୍ଚ ୧୯୬୫ରେ ଜନ୍ମଗ୍ରହଣ କରିଥିଲେ । ତାଙ୍କ ବାପା ଅବୁଲ ହୁସେନ୍ ଏବଂ ମାଆ ନୁର୍‌ଜାହାନ ବେଗମ । ସେ ଇଡେନ ମହିଳା କଲେଜରୁ ତାଙ୍କର ଉଚ୍ଚଶିକ୍ଷା ଶେଷ କରିବାପରେ ଲାଲମାଟିଆ ମହିଳା ମହାବିଦ୍ୟାଳୟରୁ ସ୍ନାତକ ହାସଲ କରିଥିଲେ ।

ଅଭିନୟ ଜୀବନ

ଦିତି ୧୯୮୪ ମସିହାରେ ବଙ୍ଗଳାଦେଶ କଥାଚିତ୍ର ଜଗତରେ କାମ କରିବା ଆରମ୍ଭ କରିଥିଲେ, ମାତ୍ର ଏହା ପୂର୍ବରୁ ଜଣେ ଗାୟିକା ଭାବରେ ପ୍ରଥମେ କାମ କରୁଥିଲେ । ଜଣେ ଗାୟିକା ଭାବରେ ସେ ବଙ୍ଗଳାଦେଶ ଶିଶୁ ଆକାଡେମୀଦ୍ୱାରା ଏକ ଜାତୀୟ ସ୍ତରୀୟ ପ୍ରତିଯୋଗିତାରେ ଭାଗନେଇଥିଲେ ଏବଂ ଏକ ପୁରସ୍କାର ଜିତିଥିଲେ । ବଙ୍ଗଳାଦେଶ ଟିଭିରେ ଦିତି ଏକ କାର୍ଯ୍ୟକ୍ରମରେ ଗୀତ ଗାଉଥିବାବେଳେ ଅଲ୍ ମନ୍‌ସୁରଙ୍କ ନଜରକୁ ଆସିଥିଲେ ଏବଂ ସେ ତାଙ୍କୁ ତାଙ୍କର ଏକ ଦୂରଦର୍ଶନ ନାଟକ ଲୈଲା ମଜନୁ ପାଇଁ ଅଭିନେତା ମାନସ ବନ୍ଦୋପାଧ୍ୟାୟଙ୍କ ସ‌ହ କାମ କରିବାର ସୁଯୋଗ ଦେଇଥିଲେ । ଏହପରେ ୧୯୮୪ ମସିହାରେ ଦିତି ଏକ ଅଭିନୟ ପ୍ରତିଯୋଗିତା ଭାଗନେଇଥିଲେ ଏବଂ ସେଥିରେ ସଫଳ ହୋଇ ବଙ୍ଗଳାଦେଶୀ କଥାଚିତ୍ର ଜଗତରେ ଅଭିନୟ କରିବା ଆରମ୍ଭ କରିଥିଲେ ।

ତାଙ୍କ ଅଭିନୀତ ପ୍ରଥମ କଥାଚିତ୍ର ଥିଲା ଡାକ ଦିୟେ ଜୟ, ଯାହାର ନିର୍ଦ୍ଦେଶନା ଦେଇଥିଲେ ଉଦୟନ ଚୌଧୁରୀ । ମାତ୍ର ଏହି କଥାଚିତ୍ରଟିର ମୁକ୍ତିଲାଭ କରିପାରିନଥିଲା ଏବଂ ମୁକ୍ତିଲାଭ କରିଥିବା ତାଙ୍କ ଅଭିନୀତ ପ୍ରଥମ କଥାଚିତ୍ର ଥିଲା ଆମି ଓ ଓସ୍ତାଦ । ଏଥିସ‌ହିତ ସେ କିଛି ଦୂରଦର୍ଶନ ଧାରାବାହିକରେ ଅଭିନୟ କରିଥିଲେ ଏବଂ ରୋଷେଇ ଶିକ୍ଷା ଉପରେ ଆଧାରିତ ଏକ ଦୂରଦର୍ଶନ କାର୍ଯ୍ୟକ୍ରମରେ ଉପସ୍ଥାପିକା ଭାବରେ କାର୍ଯ୍ୟ କରିଥିଲେ ।

ବୈବାହିକ ଜୀବନ

ଦିତି ୧୯୮୬ ମସିହାରେ ଅଭିନେତା ସୋହେଲ ଚୌଧୁରୀଙ୍କୁ ବିବାହ କରିଥିଲେ । ସୋହେଲ ଏବଂ ଦିତି ଉଭୟ ଗୋଟିଏ ବର୍ଷରେ ନୂତନ ମୁଖେର ସନ୍ଧାନେ ପ୍ରତିଯୋଗିତାର ବିଜେତା ହୋଇଥିଲେ । ୧୯୯୮ ମସିହାରେ ବନାନୀ ମଡେଲ ଟାଉନଠାରେ ଥିବା ଟ୍ରମ୍ପ କ୍ଲବରେ ସୋହେଲଙ୍କୁ ଗୁଳିମାରି ହତ୍ୟା କରାଯାଇଥିଲା । ଏହି ଘଟଣା ପୂର୍ବରୁ ଏହି ଦମ୍ପତିଙ୍କର ବିବାହ ବିଚ୍ଛେଦ ଘଟିଥିଲା । ଉଭୟଙ୍କର ଗୋଟିଏ ଝିଅ ଓ ଗୋଟିଏ ପୁଅ ଅଛି । ଝିଅ ଲାଇମା ଚୌଧୁରୀ ୧୯୮୭ ମସିହାରେ ଏବଂ ପୁଅ ଶଫୟେତ ଚୌଧୁରୀ ଦୀପ୍ତ ୧୯୮୯ରେ ଜନ୍ମଗ୍ରହଣ କରିଥିଲେ । ପରବର୍ତ୍ତୀ ସମୟରେ ଇଲିଆସ କଞ୍ଚନଙ୍କୁ ଦିତି ବିବାହ କରିଥିଲେ ଏବଂ ଉଭୟଙ୍କର ମଧ୍ୟ ବିବାହ ବିଚ୍ଛେଦ ହୋଇଥିଲା ।

ମୃତ୍ୟୁ

୨୫ ଜୁଲାଇ ୨୦୧୫ରେ ଦିତିଙ୍କୁ ମସ୍ତିଷ୍କ କର୍କଟ ହୋଇଥିବା କଥା ଜଣାପଡ଼ିଥିଲା । ଏହାପରେ ସେ ଭାରତର ଚେନ୍ନାଇସ୍ଥିତ ମାଡ୍ରାସ ଇନିଷ୍ଟିଚିଉଟ ଅଫ ଅର୍ଥପେଡ଼ିକ୍ ଆଣ୍ଡ ଟ୍ରୌମାଟୋଲିଜିରେ ଚିକିତ୍ସିତ ହୋଇଥିଲେ । ମାତ୍ର ୨୦ ମାର୍ଚ୍ଚ ୨୦୧୬ରେ ବଙ୍ଗଳାଦେଶର ଢାକାସ୍ଥିତ ଇଉନାଇଟେଡ୍ ହସ୍ପାତାଳଠାରେ ମୃତ୍ୟୁବରଣ କରିଥିଲେ ।

ବାହାର ଆଧାର

• ଇଣ୍ଟରନେଟ ମୁଭି ଡାଟାବେସରେ ପରବୀନ ସୁଲତାନା ଦିତି