ଅଦା ଶର୍ମା

ଅଦା ଶର୍ମା (ଜନ୍ମ: ୧୧ ମଇ ୧୯୯୧) ଜଣେ ଭାରତୀୟ କଥାଚିତ୍ର ଅଭିନେତ୍ରୀ । ସେ ମୁଖ୍ୟତଃ ହିନ୍ଦୀ, ତେଲୁଗୁ ଏବଂ ତାମିଲ ଭାଷା ଚଳଚ୍ଚିତ୍ରରେ ଅଭିନୟ କରିଛନ୍ତି । ଅଦା ତାଙ୍କ ବିଦ୍ୟାଳୟ ଶିକ୍ଷା ଶେଷ କରିବା ପରେ ୨୦୦୮ରେ ହିନ୍ଦୀ କଥାଚିତ୍ର ଜଗତରେ ଅଭିନୟ ଆରମ୍ଭ କରିଥିଲେ । ସେ ହିନ୍ଦୀ କଥାଚିତ୍ର ୧୯୨୦ ଜରିଆରେ ଅଭିନୟ ଜଗତରେ ପ୍ରବେଶ କରିଥିଲେ । ଏହି ଚଳଚ୍ଚିତ୍ର ପାଇଁ ଅଦାଙ୍କୁ ଫିଲ୍ମ‌ଫେୟାରରେ ଶ୍ରେଷ୍ଠ ନବାଗତା ଭାବରେ ମନୋନୀତ କରାଯାଇଥିଲା । ପରେ ସେ ୨୦୧୪ରେ ତେଲୁଗୁ କଥାଚିତ୍ର ଜଗତରେ ଅଭିନୟ ଆରମ୍ଭ କରିଥିଲେ । ପରେ ସେ କନ୍ନଡ଼ ଏବଂ ତାମିଲ କଥାଚିତ୍ର ଜଗତରେ ଅଭିନୟ ଆରମ୍ଭ କରିଥିଲେ । ଅଦାଙ୍କ ଅଭିନୀତ ସଫଳତମ ହିନ୍ଦୀ ଚଳଚ୍ଚିତ୍ରଗୁଡ଼ିକ ହେଲା ୨୦୧୪ର ହସି ତୋ ଫସି, ୨୦୧୭ର କମାଣ୍ଡୋ ୨ । ଅଦାଙ୍କ ତେଲୁଗୁ କଥାଚିତ୍ର ଜଗତରେ ମଧ୍ୟ ଜଣେ ସଫଳ ଅଭିନେତ୍ରୀ ଭାବରେ ସ୍ଥାନ ପାଇଛନ୍ତି ।

ଅଦା ଶର୍ମା
୨୦୧୪ର ଲ୍ୟାକ୍‌ମି ଫ୍ୟାସନ ଉଇକ୍‌ରେ ଅଦା
ଜନ୍ମ	ଅଦା ଶର୍ମା (1991-05-11) ୧୧ ମଇ ୧୯୯୧ ପାଲାକ୍କଡ଼, କେରଳ, ଭାରତ
ଜାତୀୟତା	ଭାରତୀୟ
ବୃତ୍ତି	ଅଭିନେତ୍ରୀ
ସକ୍ରିୟ ବର୍ଷ	୨୦୦୮–ଏବେଯାଏଁ

ପ୍ରାରମ୍ଭିକ ଜୀବନ

ଅଦା ଶର୍ମା ୧୧ ମଇ ୧୯୯୧ରେ ଏକ ତାମିଲ ବ୍ରାହ୍ମଣ ପରିବାରରେ ଜନ୍ମଗ୍ରହଣ କରିଥିଲେ । ସେ କେରଳର ପାଲାକ୍କଡ଼ରେ ଜନ୍ମ ହୋଇଥିଲେ ଏବଂ ମୁମ୍ବାଇରେ ବଡ଼ ହୋଇଥିଲେ । ତାଙ୍କ ବାପା ଜଣେ ଜଳ ସେନାଧିକାରୀ ଏବଂ ମାଆ ଜଣେ ଶାସ୍ତ୍ରୀୟ ସଙ୍ଗୀତ ନର୍ତ୍ତକୀ । ଅଦା ମୁମ୍ବାଇର ପାଲି ହିଲ୍‌ର ଅକ୍ଷିଅମ୍ କନ୍‌ଭେଣ୍ଟ ସ୍କୁଲ‌ରୁ ତାଙ୍କର ବିଦ୍ୟାଳୟ ଶିକ୍ଷା ଶେଷ କରିଥିଲେ । ସେ ଦଶମ ଶ୍ରେଣୀରେ ପଢ଼ୁଥିବାବେଳେ ଅଭିନେତ୍ରୀ ହେବା ପାଇଁ ଇଚ୍ଛା କରିଥିଲେ ଏବଂ ସେ ସେତେବେଳ ହିଁ ବିଦ୍ୟାଳୟ ତ୍ୟାଗ କରିବାକୁ ଚାହିଁଥିଲେ, ମାତ୍ର ତାଙ୍କ ବାପାମାଆ ତାଙ୍କୁ ଅତିକମ୍‌ରେ ବିଦ୍ୟାଳୟ ଶିକ୍ଷା ଶେଷ କରିବା ପାଇଁ ପରାମର୍ଶ ଦେଇଥିଲେ । ସେ ତାଙ୍କର ଦ୍ୱାଦଶ ଶ୍ରେଣୀ ଶିକ୍ଷା ପରେ, ପାଠପଢ଼ା ବନ୍ଦ କରିଥିଲେ ।

ଅଦା ତିନି ବର୍ଷ ବୟସରୁ ନୃତ୍ୟ କରୁଛନ୍ତି ଏବଂ ସେ ମୁମାଇର ନଟରାଜ ଗୋପୀ କ୍ରିଷ୍ଣା କଥକ ଡ୍ୟାନ୍ସ ଏକାଡେମିରୁ କଥକରେ ସ୍ନାତକ ହାସଲ କରିଛନ୍ତି । ସେ ମଧ୍ୟ ଯୁକ୍ତରାଷ୍ଟ୍ରରେ ୪ ମାସର ସାଲ୍‌ସା ନୃତ୍ୟ ଶିକ୍ଷା କରିଛନ୍ତି । ଏତଦ ବ୍ୟତୀତ ସେ ବେଲି ଡ୍ୟାନ୍ସିଂ ମଧ୍ୟ କରନ୍ତି ।

ଅଭିନୟ ଜୀବନ

ଅଦା ଚଳଚ୍ଚିତ୍ର ଜଗତରେ ପ୍ରବେଶ କରିବା ପାଇଁ ଅନେକ ଜାଗରେ ଅଡିସନ୍ ଦେଇଥିଲେ । ମାତ୍ର ତାଙ୍କର କର୍ଲି ଚୁଟି ଏବଂ ଅଳ୍ପ ବୟସ ପାଇଁ ସେ ସବୁଥିରେ ବିଫଳ ହୋଇଥିଲେ । ପରେ ସେ ୨୦୦୮ରେ ୧୯୨୦ ଚଳଚ୍ଚିତ୍ର ଜରିଆରେ ଅଭିନୟ ଆରମ୍ଭ କରିଥିଲେ । ଏହାପରେ ସେ ୨୦୧୪ରେ ତେଲୁଗୁ କଥାଚିତର ଜଗତରେ ଅଭିନୟ ଆରମ୍ଭ କରିଥିଲେ । ନିତିନ୍‌ଙ୍କ ସ‌ହ ହାର୍ଟ ଆଟାକ୍ ଚଳଚ୍ଚିତ୍ର ଜରିଆରେ ସେ ତେଲୁଗୁ କଥାଚିତ୍ର ଜଗତରେ ପ୍ରବେଶ କରିଥିଲେ । ୨୦୧୫ରେ ସେ ରାଣା ବିକ୍ରମ ଚଳଚ୍ଚିତ୍ର ଜରିଆରେ ସେ କନ୍ନଡ଼ କଥାଚିତ୍ର ଜଗତରେ ମଧ୍ୟ ପ୍ରବେଶ କରିଥିଲେ । ୨୦୧୬ରେ ସେ ତାମିଲ ଚଳଚ୍ଚିତ୍ର ଇଧୁ ନାମ୍ମା ଅଲ୍ଲୁରେ ଅତିଥି କଳାକାର ଭାବରେ ଅଭିନୟ କରିଥିଲେ ।

ଅଦାଙ୍କ ଅଭିନୀତ ସଫଳ ହିନ୍ଦୀ କଥାଚିତ୍ରଗୁଡ଼ିକ ହେଲା: ୨୦୧୪ର ହସି ତୋ ଫସି ଏବଂ ୨୦୧୭ର କମାଣ୍ଡୋ ୨ ।

ଅଭିନୀତ କଥାଚିତ୍ର

• ୨୦୦୮: ୧୯୨୦ (ହିନ୍ଦୀ)
• ୨୦୧୧: ଫିର୍ (ହିନ୍ଦୀ)
• ୨୦୧୩: ହମ୍ ହୈ ରାହି କାର୍ କେ (ହିନ୍ଦୀ)
• ୨୦୧୪: ହାର୍ଟ ଆଟାକ୍ (ତେଲୁଗୁ)
• ୨୦୧୪: ହସି ତୋ ଫସି (ହିନ୍ଦୀ)
• ୨୦୧୫: ସନ୍ ଅଫ୍ ସତ୍ୟ ମୂର୍ତ୍ତୀ (ତେଲୁଗୁ)
• ୨୦୧୫: ରାଣା ବିକ୍ରମ (କନ୍ନଡ଼)
• ୨୦୧୫: ସୁବ୍ରମଣ୍ୟମ୍ ଫର୍ ସେଲ୍ (ତେଲୁଗୁ)
• ୨୦୧୬: ଗରମ୍ (ତେଲୁଗୁ)
• ୨୦୧୬: କସନମ୍ (ତେଲୁଗୁ)
• ୨୦୧୬: ଇଧୁ ନାମା ଅଲ୍ଲୁ (ତାମିଲ)
• ୨୦୧୭: କମାଣ୍ଡୋ ୨ (ହିନ୍ଦୀ)

ଅଧିକ ତ‌ଥ୍ୟ

• ଇଣ୍ଟରନେଟ ମୁଭି ଡାଟାବେସରେ ଅଦା ଶର୍ମା