ରାଧାଗୋବିନ୍ଦ ପଟ୍ଟନାୟକ

ରାଧାଗୋବିନ୍ଦ ପଟ୍ଟନାୟକ (୨୮ ଡିସେମ୍ବର ୧୯୨୯–୧୯୯୪) ଜଣେ ଭାରତୀୟ ଓଡ଼ିଆ-ଭାଷୀ ପ୍ରଛଦପଟ୍ଟ ଗାୟକ ଥିଲେ । ତାଙ୍କ ଗୀତସବୁ ମୁଖ୍ୟତଃ ଆକାଶବାଣୀ କଟକ ଏବଂ ରେକର୍ଡ଼ ଜରିଆରେ ପ୍ରସାରିତ ହୋଇଥିଲା । ସେ ହିନ୍ଦୀ ଚଳଚ୍ଚିତ୍ର ସଂଗୀତକାର ଚିତ୍ରଗୁପ୍ତଙ୍କ ନିର୍ଦ୍ଦେଶନାରେ କଣ୍ଠଦାନ କରିଥିବା ପ୍ରଥମ ଓଡ଼ିଆ ଗାୟକ ଥିଲେ ।

ପ୍ରାରମ୍ଭିକ ଜୀବନୀ‌

୧୯୨୯ ମସିହା ଡିସେମ୍ବର ୨୮ ତାରିଖରେ ରାଧାଗୋବିନ୍ଦ ପଟ୍ଟନାୟକ କଟକ ଜିଲ୍ଲାର ନରସିଂହପୁରର ଏକ ସମ୍ଭ୍ରାନ୍ତ ପରିବାରରେ ଜନ୍ମଗ୍ରହଣ କରିଥିଲର । ପିତା ନଟବର ପଟ୍ଟନାୟକ ଥିଲେ ଡେପୁଟି ମାଜିଷ୍ଟ୍ରେଟ୍ । ରାଧାଗୋବିନ୍ଦ ରେଭେନ୍ସା କଲେଜିଏଟ ସ୍କୁଲରେ ପଢ଼ିଥିଲେ । ତେବେ ପାଠ ଅପେକ୍ଷା ତାଙ୍କର ସାଂସ୍କୃତିକ କାର୍ଯ୍ୟକ୍ରମରେ ବେଶୀ ଆଗ୍ରହୀ ଥିଲେ । ୧୯୪୪ରେ ମାଟ୍ରିକ୍ ପାସ୍ କରି କଲେଜ ଯାଇଥିଲେ ।

ବୃତ୍ତିଗତ ଜୀବନ

୧୯୪୬ରେ ସେ କୌଣସି ସଂପର୍କୀୟଙ୍କ ମାଧ୍ୟମରେ ସେ ବମ୍ବେରେ ପହଞ୍ଚିଥିଲେ । ସେତେବେଳେ ଭାରତୀୟ ସ୍ୱାଧୀନତା ଆନ୍ଦୋଳନରେ ତରୁଣମାନେ ଯୋଗଦେଇଥିଲେ । ସେଠାର ସଂଗୀତ ନିର୍ଦ୍ଦେଶକମାନଙ୍କୁ ଭେଟିବାକୁ ଚେଷ୍ଟାକରିଥିଲର । ସେ ଦୁଇ ଜଣ ସଂଗୀତ ନିର୍ଦ୍ଦେଶକ ସି ରାମଚନ୍ଦ୍ର ଓ ଚିତ୍ରଗୁପ୍ତଙ୍କ ସହ ଭେଟିଥିଲେ । ସେ ଚିତ୍ରଗୁପ୍ତଙ୍କ ସଂଗୀତ ନିର୍ଦ୍ଦେଶନାରେ ଜାଦୁଇ ରତନ (୧୯୪୭) ଚଳଚ୍ଚିତ୍ରରେ ଗାଇଥିଲେ । ଗୀତା ଦତ୍ତଙ୍କ ସହ ସେ "ମେରା ନହ୍ନା ସା ଦିଲ୍" ଓ "ନୈନୋଁ ମେଁ ଆନା" ନାମରେ ଦୁଇଟି ଡୁଏଟ ଗାଇଥିଲେ । ପରେ ବାପାଙ୍କ ମୃତ୍ୟୁ ଖବର ପାଇ ସେ ୧୯୫୨ରେ କଟକ ଫେରିଥିଲେ । ପରେ ସେ କଟକ ରେଡ଼ିଓ ଷ୍ଟେସନରେ ସ୍ୱୀକୃତିପ୍ରାପ୍ତ ଗାୟକ ହିସାବରେ ଗାଇବା ଆରମ୍ଭ କଲେ । ପରେ ଚୌଦ୍ୱାରରେ ସେ କଳିଙ୍ଗ ଟ୍ୟୁବ୍ସରେ ଚାକିରୀରେ ଯୋଗଦେଲେ । ଭୁବନେଶ୍ବର ମିଶ୍ର ଓ ବାଳକୃଷ୍ଣ ଦାଶଙ୍କ ଯୁଗ୍ମ ସଂଗୀତ ନିର୍ଦ୍ଦେଶନାରେ ସେ କାଳୀଚରଣ ପଟ୍ଟନାୟକଙ୍କ "ଧିର ସମୀରେ କୁଞ୍ଜବନେ" ଗୀତଟି ଗାଇଥିଲେ ।

ଶେଷ ଜୀବନ

ପ୍ରାୟ ୨୫ ବର୍ଷ ଚାକିରୀ କଲାପରେ ସତୁରୀ ଦଶକର ମଧ୍ୟଭାଗରେ ସେ କଳିଙ୍ଗ ଟ୍ୟୁବ୍ସର ଚିଫ୍ କଣ୍ଟ୍ରୋଲର୍ ଅଫ୍ ଷ୍ଟୋର୍ସ ପଦରୁ ଅବସର ନେଇଥିଲେ । ୧୯୯୪ ମସିହାରେ ୬୫ ବର୍ଷ ବୟସରେ ତାଙ୍କର ଦେହାନ୍ତ ହୋଇଥିଲା ।

ଗୀତ ତାଲିକା

କଥାଚିତ୍ର

କ୍ରମ	ଗୀତ	ଗୀତିକାର	ସଙ୍ଗୀତ ନିର୍ଦ୍ଦେଶକ	କଥାଚିତ୍ର	ମନ୍ତବ୍ୟ/ଆଧାର
୧	ଧିର ସମୀରେ କୁଞ୍ଜବନେ	କାଳୀଚରଣ ପଟ୍ଟନାୟକ	ଭୁବନେଶ୍ବର ମିଶ୍ର ଓ ବାଳକୃଷ୍ଣ ଦାଶ	କେଦାର ଗୌରୀ (୧୯୫୪)

ଅନ୍ୟାନ୍ୟ

କ୍ରମ	ଗୀତ	ଗୀତିକାର	ମନ୍ତବ୍ୟ/ଆଧାର
୧	ବହୁ ଦୂରେ ମୋର ପ୍ରିୟାର	ବୃନ୍ଦାବନ ଜେନା
୨	ରାତିର ମୁଲକେ ଯେବେ	ବୃନ୍ଦାବନ ଜେନା
୩	ଏ ବୁକୁର ମୂକ ଭାଷା ତଳେ	ମାଧବ ଚରଣ ମହାନ୍ତି