ଅଥୀନା
ଅଥୀନା (ଅଥବା ଅଥାନା, ଅଥେନେ, ଅଥେନା) ଇଂରାଜୀ : Athena , ୟୁନାନୀ : ଅଥୈନା ପ୍ରାଚୀନ ୟୁନାନୀ ଦେବୀ । ଗ୍ରୀକ୍ ଧର୍ମ ଓ ପୌରାଣିକ କିମ୍ବଦନ୍ତୀ ଅନୁସାରେ ଅଥୀନା ବା ଅଥୀନି (କିମ୍ବା ପାଲାସ୍ ଅଥୀନା ବା ଅଥୀନି) ହେଉଛନ୍ତି ବୁଦ୍ଧି-ବିଦ୍ୟା, ଗଣିତ, ସାହସ, ପ୍ରେରଣା, ସଂସ୍କୃତି, ନ୍ୟାୟ, ସାମରିକ କୌଶଳ, ଶକ୍ତି ଏବଂ ସମସ୍ତ କଳା, ଶିଳ୍ପ ଓ କୌଶଳର ଦେବୀ । ପ୍ରାଚୀନ ରୋମାନ୍ ଧର୍ମରେ ତାଙ୍କ ସମକକ୍ଷ ଦେବୀ ହେଉଛନ୍ତି ମିନର୍ଭା ।
| ଅଥୀନା | |
|---|---|
 Mattei Athena at Louvre. Roman copy from the 1st century BC/AD after a Greek original of the 4th century BC, attributed to Cephisodotos or Euphranor. | |
| Goddess of Wisdom | |
| ଲୋକ | Mount Olympus |
| Symbol | Owls, Olive trees, Snakes, Aegis, Armor, Helmets, Spears, Gorgoneion |
| ପିତାମାତା | Metis; Metis and Zeus; Zeus[୧] |
| ଭାଇଭଉଣୀ | Artemis, Aphrodite, the Muses, the Graces, Ares, Apollo, Dionysus, Hebe, Hermes, Heracles, Helen of Troy, Hephaestus, Minos, Perseus, Porus |
| Roman equivalent | Minerva |
ଶୂରବୀର ଓ ବୀରତ୍ୱପୂର୍ଣ୍ଣ କାର୍ଯ୍ୟର ଅଧିଷ୍ଠାତ୍ରୀ ଦେବୀ ହିସାବରେ ତାଙ୍କୁ ପ୍ରାୟତଃ ପ୍ରଚୀନ ଗ୍ରୀକ୍ ବୀରମାନଙ୍କ ସହଚରୀ ରୂପେ ଚିତ୍ରଣ କରାଯାଏ । ସେ ଆଟ୍ରିକା ପ୍ରଦେଶ ଏବଂ ବିୟୋତିଆ ପ୍ରଦେଶ ମଧ୍ୟରେ ଥିବା ଏଥେନ୍ସ୍ ନଗରୀର ଅଧିଷ୍ଠାତ୍ରୀ କୁମାରୀ ଦେବୀ । ଏଥେନ୍ସ୍ ନଗରୀ ତାଙ୍କରି ନାମରେ ନାମିତ ଓ ଏଠାରେ ତାଙ୍କୁ ସମର୍ପିତ ପାର୍ଥେନନ୍ ନାମକ ବିଶାଳ ମନ୍ଦିର ରହିଛି । ସହଜେ ତ ସହର (polis)ର ସୁରକ୍ଷାଦାତ୍ରୀ ଦେବୀ ହିସାବରେ ପ୍ରାୟ ଅଧିକାଂଶ ଗ୍ରୀକ୍ ସହରମାନଙ୍କରେ ସେ ପୂଜ୍ୟ ଥିଲେ, ତେବେ ଏଥେନ୍ସ୍ରେ ସେ ଜୀବନର ଅଭିନ୍ନ ଅଙ୍ଗ ଥିଲେ ।
କିମ୍ବଦନ୍ତୀ
ସମ୍ପାଦନାଜନ୍ମ
ସମ୍ପାଦନାଅଥୀନାଙ୍କୁ ପ୍ରାୟତଃ ଗୀକ୍ ଦେବତା ଜିଉସ୍ଙ୍କ ସର୍ବପ୍ରିୟ ଝିଅ ରୂପେ ଚିତ୍ରିତ କରାଯାଇଥାଏ । ତାଙ୍କ ଜନ୍ମ ବିଷୟରେ ଥିବା ବିଭିନ୍ନ ଗାଥାଗୁଡ଼ିକ ମଧ୍ୟରୁ ସର୍ବାଧିକ ପ୍ରଚଳିତ ହେଲା ଏପରି: ଥରେ ଜିଉସ୍, ବୁଦ୍ଧି ଓ ଚତୁରତାର ଦେବୀ ମେଟିସ୍ଙ୍କ ସହ ସମ୍ଭୋଗ କଲେ । ପୂର୍ବୋକ୍ତ ଭବିଷ୍ୟବାଣୀ ହୋଇଥିଲା ଯେ ମେଟିସ୍ଙ୍କ ସନ୍ତାନ ଜିଉସ୍ଙ୍କଠାରୁ ଅଧିକ ଶକ୍ତିଶାଳୀ ହେବ । ଏଣୁ ପରିସ୍ଥିତି ବିଷମ ହୋଇପାରେ ବୋଲି ଚିନ୍ତା କରି ଜିଉସ୍, ମେଟିସ୍ଙ୍କୁ ଜୀଅନ୍ତା ଗିଳିଦେଲେ । କିନ୍ତୁ ସେ ଯାଏଁ ମେଟିସ୍ ଗର୍ଭବତୀ ହୋଇ ସାରିଥାନ୍ତି ।
କାଳକ୍ରମେ ଜିଉସ୍ ଭୀଷଣ ମୁଣ୍ଡବ୍ୟଥାରେ ଗ୍ରସ୍ତ ହେଲେ । ଏହାପରେ ପ୍ରୋମେଥିଅସ୍, ହେପ୍ହାଏସ୍ତସ୍, ହର୍ମିସ୍, ଏରିସ୍ କିମ୍ବା ପାଲେମନ୍ (କିମ୍ବଦନ୍ତୀର ସ୍ରୋତାନୁସାରେ ଭିନ୍ନ ଭିନ୍ନ) ଇଆବ୍ରିସ୍ ନାମକ କୁଠାରରେ ତାଙ୍କ ଶିରଶ୍ଛେଦନ କରନ୍ତେ ସମ୍ପୂର୍ଣ୍ଣ ଅସ୍ତ୍ରଶସ୍ତ୍ର ଓ ସାଞ୍ଜୁ ଖଞ୍ଜିତ ଅଥୀନା ଯୁଦ୍ଧଡାକରା ଦେଇ ଆବିର୍ଭୂତ ହେଲେ । ପ୍ରାୟ ଗାଥା ଅନୁସାରେ ଜିଉସ୍ଙ୍କ ପତ୍ନୀ ହେରା ଏହି ଘଟଣାରେ ରାଗି ନିଜେ ନିଜେ ହେପ୍ହାଏସ୍ତସ୍ଙ୍କୁ ଜନ୍ମ ଦେଇଥିଲେ । ’କ୍ରାଟିଲସ୍’ ପୁସ୍ତକରେ ପ୍ଲାଟୋ ଲେଖିଛନ୍ତି ଯେ ଅଥୀନା ନାମର ଅର୍ଥ ’ଦେବତାଙ୍କ ଚିନ୍ତା’ (theou+noesis) ।
ଅନ୍ୟାନ୍ୟ କିମ୍ବଦନ୍ତୀ
ସମ୍ପାଦନାଅନ୍ୟ କିଛି କିମ୍ବଦନ୍ତୀ ଅନୁସାରେ ଅଥୀନା ଅଲମ୍ପସ୍ ବାହାରେ ଜନ୍ମ ହେଲେ ଓ ଦେବତା ଟ୍ରିଟନ୍ଙ୍କଦ୍ୱାରା ପରିପାଳିତ ହୋଇଥିଲେ । ସାଞ୍ଚୁନିଆଥନ୍ ନାମକ ଐତିହାସିକଙ୍କ ପାଣ୍ଡୁଲିପିର ଅଂଶବିଶେଷ ଅନୁସାରେ ଅଥୀନା ଖ୍ରୋନୋସ୍ଙ୍କ ଝିଅ । ଏହା ଅନୁସାରେ ଅଥୀନା ଜିଉସ୍ ଓ ହେରାଙ୍କ ଭଉଣୀ ହେବେ ।
କୁମାରୀ ଅଥୀନା
ସମ୍ପାଦନାପ୍ରାୟ ଗ୍ରୀକ୍ ଦେବଦେବୀ ବିବାହିତ ଥିଲେ କିମ୍ବା ସେମାନଙ୍କ ପ୍ରେମିକ ବା ପ୍ରେମିକା ଥିଲେ । କିନ୍ତୁ ଅଥୀନା ଏଥିରୁ ଭିନ୍ନ ଓ ଚିରକୁମାରୀ ଥିଲେ । ଏଥେନ୍ସ୍ର ଆକ୍ରୋପଲିସ୍ରେ ଥିବା ତାଙ୍କ ସର୍ବପ୍ରସିଦ୍ଧ ମନ୍ଦିର ପାର୍ଥେନନର ନାମକରଣ ତେଣୁକରି ଏପରି ହୋଇଛି (parthenos ଅର୍ଥ କୁମାରୀ) । ମନ୍ଦିରଟି କେବଳ ତାଙ୍କର କୁମାରୀତ୍ୱର ପ୍ରତୀକ ନଥିଲା ବରଂ ତାଙ୍କୁ ଯୌନ ସଂଯମ ଓ ସତୀତ୍ୱ ରକ୍ଷାର ଦେବୀ ରୂପେ ମଧ୍ୟ ଦର୍ଶାଉଥିଲା । ତତ୍କାଳୀନ ରକ୍ଷଣଶୀଳ ସମାଜରେ ଏହି କୁମାରୀତ୍ୱ ଶୁଦ୍ଧତାର ପ୍ରତୀକ ମଧ୍ୟ ଥିଲା ।
ଏରିଖ୍ତୋନିଉସ୍
ସମ୍ପାଦନାହେପ୍ହାଏସ୍ତସ୍ ଏକଦା ଅଥୀନାଙ୍କୁ ଧର୍ଷଣର ଚେଷ୍ଟା କଲେ କିନ୍ତୁ ଅଥୀନା ନିଜ ଚତୁରତାରୁ ସେଠୁ ଖସିଗଲେ । କିନ୍ତୁ ହେପ୍ହାଏସ୍ତସ୍ଙ୍କ ବୀର୍ଯ୍ୟ ପୃଥିବୀ ଉପରେ ପଡିଲା ଓ ପୃଥିବୀର ଦେବୀ ଗାୟାଙ୍କଠାରୁ ଏରିଖ୍ତୋନିଉସ୍ ଜନ୍ମ ନେଲେ । ସାବତ ପୁଅ ରୂପେ ଅଥୀନା ତାଙ୍କୁ ପାଳିଲେ ।
କିମ୍ବଦନ୍ତୀ ଅନୁସାରେ ଦେବୀ, ଶିଶୁ ଏରିଖ୍ତୋନିଉସ୍ଙ୍କୁ ଗୋଟେ ଛୋଟ ବାକ୍ସରେ ରଖି ଏଥେନ୍ସର ତିନି ଭଉଣୀ ହର୍ସି, ପାଣ୍ଡ୍ରୋସସ୍ ଓ ଆଗ୍ଲାଉଲସ୍ଙ୍କୁ ଜଗିବାକୁ ଦେଲେ । ସେ ନ ଫେରିବା ଯାଏଁ ବାକ୍ସ ନ ଖୋଲିବା ଲାଗି ଚେତାବନୀ ଦେଇ ସେ ଚାଲିଗଲେ । କଥା ନ ମାନି ବାକ୍ସ ଖୋଲି ଦିଅନ୍ତେ ଏରିଖ୍ତୋନିଉସ୍ ସର୍ପ ରୂପରେ ପ୍ରକଟ ହେଲେ । ତାଙ୍କ ଶକ୍ତିରେ ପାଗଳ ହୋଇ ହର୍ସି ଓ ଆଗ୍ଲାଉଲସ୍ ପାହାଡରୁ ଡେଇଁ ଆତ୍ମହତ୍ୟା କଲେ । ଐତିହାସିକଙ୍କ ମତରେ ଏହି ଗଳ୍ପଟି ଥେସ୍ମୋଫୋରିଆ ପୂଜାରେ (ଯେଉଁଥିରେ ଏକ ଛୋଟ ବାକ୍ସ ବ୍ୟବହୃତ ହୁଏ) ଭାଗ ନେଉଥିବା ଯୁବତୀମାନଙ୍କ ପାଇଁ ଉଦ୍ଦିଷ୍ଟ ।
ରୋମର କବି ଓଭିଦ୍ଙ୍କ (୪୩-୧୭ଖ୍ରୀ.ପୂ) କିମ୍ବଦନ୍ତୀ ଅନୁସାରେ ଦେବତା ହର୍ମିସ୍, ହର୍ସିକୁ ଭଲପାଇବସନ୍ତି । ତିନି ଭଉଣୀ ଅଥୀନାଙ୍କ ପୂଜା ଲାଗି ମନ୍ଦିର ଯାଆନ୍ତି ଆଉ ସେଇଠି ହର୍ସିକୁ ମନେଇବା ଲାଗି ଆଗ୍ଲାଉଲସ୍କୁ ହର୍ମିସ୍ କହନ୍ତି । ଏଥିଲାଗି ଆଗ୍ଲାଉଲସ୍ ତାଙ୍କଠୁ ଅର୍ଥ ଆଶା କରିବାରୁ ହର୍ମିସ୍ ତାକୁ ସେଇ ଧନରାଶି ଦିଅନ୍ତି ଯାହାକି ତିନି ଭଉଣୀ ଅଥୀନାଙ୍କୁ ଅର୍ପଣ କରିସାରିଥା’ନ୍ତି । ଆଗ୍ଲାଉଲସ୍ର ଲୋଭର ଦଣ୍ଡସ୍ୱରୂପ ଅଥୀନା ଆଗ୍ଲାଉଲସ୍କୁ ନିଜ ଭଉଣୀ ହର୍ସି ପ୍ରତି ଈର୍ଷାନ୍ୱିତ କରିଦେଲେ । ଯେବେ ହର୍ମିସ୍, ହର୍ସିକୁ ପ୍ରେମଯାଚନା କରିବାକୁ ଆସିଲେ, ତାଙ୍କୁ ସାହାଯ୍ୟ କରିବା ପରିବର୍ତ୍ତେ ଆଗ୍ଲାଉଲସ୍ ତାଙ୍କ ରାସ୍ତାରେ ଛିଡା ହେବାରୁ ହର୍ମିସ୍ ତାକୁ ପଥର କରିଦେଲେ ।
ଏରିଖ୍ତୋନିଉସ୍ଙ୍କୁ ଏଥେନ୍ସର ସ୍ଥାପକ-ରାଜା ଧରାଯାଏ । ତାଙ୍କ ପ୍ରତି ଅଥୀନାଙ୍କ ସର୍ବଦା କୃପାଦୃଷ୍ଟି ରହିଥିଲା ।
ଏଥେନ୍ସର ଅଧିଷ୍ଠାତ୍ରୀ
ସମ୍ପାଦନାକିମ୍ବଦନ୍ତୀ ଅନୁସାରେ ଏଥେନ୍ସର କେହି ପ୍ରଧାନ ଦେବଦେବୀ ନଥିବା ବେଳେ ସମୁଦ୍ର ଦେବତା ପୋସାଇଡନ୍ ଓ ଅଥୀନାଙ୍କ ମଧ୍ୟରେ ପ୍ରତିଦ୍ୱନ୍ଦିତା ଥିଲା କିଏ ଏଥେନ୍ସରେ ପ୍ରଧାନ ହେବ । ଆପାତତଃ ସ୍ଥିର ହେଲା ଯେ ଦୁହେଁ ଏଥେନ୍ସକୁ ଗୋଟେ ଗୋଟେ ଉପହାର ଦେବେ ଆଉ ଏଥେନ୍ସ ବାସୀ ଯାହାର ଉପହାର ସ୍ୱୀକାର କରିବେ ସେ ହିଁ ଜିତିବ ।
ପୋସାଇଡନ୍ ନିଜ ତ୍ରିଶୂଳ ଭୂମିରେ ମାରି ଗୋଟିଏ ଲୁଣିଆ ଝରଣା ସୃଷ୍ଟି କରି ଏଥେନ୍ସକୁ ଜଳ ଓ ବାଣିଜ୍ୟର ସ୍ରୋତ ଦେଲେ । କିନ୍ତୁ ସେ ପାଣି ଭାରି ଲୁଣିଆ ଥିବାରୁ ପିଇବା ଯୋଗ୍ୟ ନଥିଲା । ଅଥୀନା ଅନ୍ୟପକ୍ଷେ ଏଥେନ୍ସକୁ ପ୍ରଥମ କୃଷି ଉପଯୋଗୀ ଅଲିଭ୍ ଗଛ ଦେଲେ । ଏଥିରୁ କାଠ, ଫଳ ଆଉ ତେଲ ମିଳୁଥିବାରୁ ଏଥେନ୍ସବାସୀ ଏହାକୁ ସ୍ୱୀକାର କଲେ । ଏପରି ଭାବେ ଅଥୀନା, ଏଥେନ୍ସର ଅଧିଷ୍ଠାତ୍ରୀ ଦେବୀ ହେଲେ । ଐତିହାସିକ ରବର୍ଟ ଗ୍ରେଭ୍ସଙ୍କ ମତରେ ଏହା ପ୍ରକୃତରେ ମାତୃକୈନ୍ଦ୍ରିକ ଓ ପିତୃକୈନ୍ଦ୍ରିକ ଧର୍ମର ବିଭେଦ ଦେଖାଏ ।
ସହଚରୀ
ସମ୍ପାଦନାକିମ୍ବଦନ୍ତୀ ଅନୁସାରେ ଅଥୀନା ଗ୍ରୀକ୍ ବୀରମାନଙ୍କ ସାହାଯ୍ୟ କରିଥାନ୍ତି । ମେଡୁସାକୁ ମାରିବାରେ ପର୍ସିୟସ୍ଙ୍କ ଅଭିଯାନରେ ସେ ସାହାଯ୍ୟ କରିଥିଲେ । ନିମୀଆର ସିଂହକୁ ମାରିବା ପରେ ତା’ର ଚମଡା ଉତାରିବା ଲାଗି ତାରି ନଖ ବ୍ୟବହାର କରିବା ଲାଗି ସେ ହେରାକ୍ଲେସ୍ଙ୍କୁ ବୁଦ୍ଧି ଦେଇଥିଲେ । ଷ୍ଟିମ୍ଫାଲିଆର ଚଢେଇକୁ ହରେଇବା ଓ ପାତାଳ ଲୋକର ସର୍ବରସ କୁକୁରକୁ କାବୁ କରିବାରେ ମଧ୍ୟ ହେରାକ୍ଲେସ୍ଙ୍କୁ ସେ ସହାୟ ହୋଇଥିଲେ ।
ଗ୍ରୀକ୍ ମହାକାବ୍ୟ ଓଡେଶୀରେ ମଧ୍ୟ ତାଙ୍କୁ ବୀର ଓଡେଶିୟସ୍ଙ୍କ ସହାୟତା କରିବାର ଦର୍ଶାଯାଇଛି । ଯଦିଓ ସେ ସିଧାସଳଖ ସଂପୃକ୍ତ ହୋଇନାହାନ୍ତି କିନ୍ତୁ ଦୂରରୁ ହିଁ ସେ ଓଡେଶିୟସ୍ଙ୍କୁ ଠିକଣା ବୁଦ୍ଧି ଯୋଗାଇଦେଉଥିଲେ । ଜାହାଜ ଦୁର୍ଘଟଣା ହେବା ପରେ ଓଡେଶିୟସ୍ ଗୋଟେ ଅଜଣା ଟାପୁରେ ଭାସିଆସି ଲାଗିଲେ । ସେ ଦ୍ୱୀପରେ ଥିବା ରାଜକୁମାରୀ ନାଉସିକାଙ୍କୁ ଦେବୀ ସ୍ୱପ୍ନରେ ଦେଖାଦେଇ ଓଡେଶିୟସ୍ଙ୍କୁ ବଞ୍ଚାଇବାକୁ ଆଦେଶ ଦେଲେ ।
ପ୍ୟାରିସ୍ଙ୍କ ବିଚାର
ସମ୍ପାଦନାଗୋଟିଏ କିମ୍ବଦନ୍ତୀ ଅନୁସାରେ ପିଲିୟସ୍ ଓ ଥେଟିସ୍ଙ୍କ ବିବାହକୁ ସବୁ ମନୁଷ୍ୟ ଓ ଦେବଦେବୀଙ୍କୁ ଆମନ୍ତ୍ରଣ କରାଯାଇଥିଲା କେବଳ କଳିର ଦେବୀ ଏରିସ୍ଙ୍କ ଛଡା । ଏଥିରେ ଈର୍ଷାନ୍ୱିତ ହୋଇ ଏରିସ୍ ଗୋଟିଏ ସୁନା ସେଓରେ ’ସବୁଠୁ ସୁନ୍ଦରୀଙ୍କ ପାଇଁ’ ଲେଖି ସେଇ ବିବାହ ଭୋଜିରେ ସବୁ ଦେବୀମାନଙ୍କ ଭିତରେ ଫିଙ୍ଗିଦେଲେ । ସେଉଟି ଲାଗି ଦେବୀ ଆଫ୍ରୋଡାଇଟି, ହେରା ଓ ଅଥୀନାଙ୍କ ଭିତରେ କଳି ଲାଗିଲା ।
ଝଗଡାର ସମାଧାନ ଲାଗି ସେମାନେ ଦେବରାଜ ଜିଉସ୍ଙ୍କ ପାଖକୁ ଗଲେ । ତେବେ ଏ କଥାରେ ମୁଣ୍ଡ ପୁରାଇବା ବିଷମ ହେବ ଜାଣି ଜିଉସ୍ ସେମାନଙ୍କୁ ଟ୍ରୟର ରାଜକୁମାର ପ୍ୟାରିସ୍ଙ୍କ ପାଖକୁ ପଠାଇଲେ । ତିନି ଦେବୀ ଟ୍ରୟ ନଗରୀ ଥିବା ଇଡା ପର୍ବତର ଝରଣାରେ ସ୍ନାନ କରି ପ୍ୟାରିସ୍ଙ୍କ ପାଖକୁ ଆସିଲେ । କିଏ ସୁନ୍ଦରୀ ବିଚାର କରିବା ଲାଗି ପ୍ୟାରିସ୍ଙ୍କ ଇଚ୍ଛାନୁସାରେ ସେମାନେ ନିର୍ବସ୍ତ୍ର ମଧ୍ୟ ହେଲେ । ତଥାପି ପ୍ୟାରିସ୍ ସ୍ଥିର କରି ପାରିଲେ ନାହିଁ । ତାଙ୍କୁ କରାୟତ୍ତ କରିବା ଲାଗି ତିନିଜଣ ଲାଞ୍ଚ ଦେବାର ଉପକ୍ରମ କଲେ । ହେରା ତଙ୍କୁ ସମଗ୍ର ଏସିଆ ଓ ଇଉରୋପର ଶାସନ ଯାଚିଲେ ତ ଅଥୀନା ତାଙ୍କୁ ବୁଦ୍ଧି, ଖ୍ୟାତି ଓ ଯୁଦ୍ଧରେ ବିଜୟ ଯାଚିଲେ । ତେବେ ଆଫ୍ରୋଡାଇଟି ତାଙ୍କୁ କହିଲେ ସେ ଯଦି ଜିତନ୍ତି ତା ହେଲେ ପ୍ୟାରିସ୍ଙ୍କୁ ପୃଥିବୀର ସବୁଠୁ ସୁନ୍ଦର ପତ୍ନୀ ମିଳିବ । ଏଥିରେ ଭଳିଯାଇ ପ୍ୟାରି ଆଫ୍ରୋଡାଇଟିଙ୍କୁ ବାଛିଲେ । ଦୁର୍ଭାଗ୍ୟବଶତଃ ପ୍ୟାରିସ୍ଙ୍କ ଭାଗ୍ୟରେ ଥିବା ସେ ସୁନ୍ଦରୀ ଜଣକ ଥିଲେ ହେଲେନ୍ ଯିଏ ପୂର୍ବରୁ ହିଁ ସ୍ପାର୍ଟାର ରାଜା ମେନେଲାଉସ୍ଙ୍କୁ ବିବାହ କରିଥିଲେ । ହେରା ଓ ଅଥୀନା ହାରିବା ରାଗରେ ପ୍ୟାରିସ୍ଙ୍କଦ୍ୱାରା ହେଲେନ୍ଙ୍କ ଅପହରଣ କରାଇ ଟ୍ରୋଜାନ୍ ଯୁଦ୍ଧ କରାଇଥିଲେ ।
ଆରାକ୍ନେର ଲୋକକଥା
ସମ୍ପାଦନାଆରାକ୍ନେର ଗଳ୍ପ ରୋମ୍ର ଗୋଟେ ଲୋକକଥା ଯାହାକି ପରେ ଗ୍ରୀକ୍ କିମ୍ବଦନ୍ତୀରେ ସ୍ଥାନିତ ହୋଇଥିଲା । ଆରାକ୍ନେର ଅର୍ଥ ବୁଢୀଆଣି । ସେ ଲାଇଡିଆ ନଗରୀର ଜଣେ ଲୁଗା ରଙ୍ଗ କରୁଥିବା ବ୍ୟବସାୟୀର ଝିଅ ଥିଲା । ସେ ତନ୍ତୀକାର୍ଯ୍ୟରେ ଅତି କୁଶଳ ଥିଲା ଯାହାକି ସେ ସ୍ୱୟଂ ଅଥୀନାଙ୍କଠାରୁ ଶିକ୍ଷା କରିଥିଲା । ଧୀରେ ଧୀରେ ତା ମନରେ ଗର୍ବ ଜାତ ହେଲା ଆଉ ସେ ପ୍ରଚାର କଲା ଯେ ସେ ଖୋଦ୍ ଅଥୀନାଙ୍କଠାରୁ ବି ଅଧିକ ପାରଙ୍ଗମ । ତାକୁ ଚେତାବନୀ ଦେବା ଲାଗି ଅଥୀନା ଜଣେ ବୁଢୀର ବେଶ ଧରି ତାକୁ ଉପଦେଶ ଦେବାକୁ ଚେଷ୍ଟା କଲେ । ଏଥିରେ ଉପହାସ କରି ଆରାକ୍ନେ ତାଙ୍କୁ ବୁଣିବା ପ୍ରତିଯୋଗିତା ଲାଗି ଆହ୍ୱାନ ଦେଲା ।
କବି ଓଭିଦ୍ଙ୍କ ଗଳ୍ପାନୁସାରେ ଅଥୀନା, ପୋସାଇଡନ୍ଙ୍କ ଉପରେ ନିଜ ବିଜୟ ଦର୍ଶାଇ ଗୋଟେ ଲୁଗା ବୁଣିଲେ । ଅନ୍ୟ ପକ୍ଷରେ ଆରାକ୍ନେ ଦେବତାମାନଙ୍କ ବିଶ୍ୱାସଘାତକତାର ଏକୋଇଶିଟି ଛବି ବୁଣିଥିଲା । ଯଦିଓ ଅଥୀନା ମାନିଲେ ଯେ ଆରାକ୍ନେର କାରୁକାର୍ଯ୍ୟ ଅତି ନିଖୁଣ ହୋଇଛି କିନ୍ତୁ ଦେବତାଙ୍କ ଅପମାନ କରିଥିବାରୁ ଅଥୀନା କ୍ରୋଧାନ୍ୱିତ ହୋଇ ସେ ବୁଣା ଲୁଗା ଆଉ ଆରାକ୍ନେର ଚରଖାକୁ ନଷ୍ଟ କରିଦେଲେ । କିଛି ଗଳ୍ପାନୁସାରେ ଦେବୀ ନିଜ ବାଡିରେ ତାକୁ ଆଘାତ କରନ୍ତେ ଆରାକ୍ନେ ବୁଢୀଆଣିରେ ପରିବର୍ତ୍ତିତ ହେଲା । ଅନ୍ୟ କିଛି ଗଳ୍ପାନୁସାରେ ନିଜ ଚରଖା ନଷ୍ଟ ହେବା ଦୁଃଖରେ ସେ ଫାଶି ଦେଇ ଆତ୍ମହତ୍ୟା କଲା । ତା ଉପରେ ସହାନୁଭୂତି ରୂପେ ଦେବୀ ତାକୁ ବୁଢୀଆଣିରେ ବଦଳିଦେଲେ । ଏ କିମ୍ବଦନ୍ତୀ ବୁଣା କାର୍ଯ୍ୟ ବୁଢୀଆଣିଠାରୁ ପ୍ରେରିତ ବୋଲି ଦର୍ଶାଏ ।
ଆଧାର
ସମ୍ପାଦନାବାହାର ତଥ୍ୟ
ସମ୍ପାଦନା
- Theoi.com Cult of Athena —Extracts of classical texts
- Roy George, "Athena: The sculptures of the goddess" —A repertory of Greek and Roman types
ଛାଞ୍ଚ:ଗ୍ରୀକ୍ ଦେବଦେବୀଙ୍କ ବଂଶାବଳୀ
 | ଏହି ପ୍ରସଙ୍ଗଟି ଅସମ୍ପୂର୍ଣ୍ଣ ଅଟେ । ଆପଣ ଏହାକୁ ସଂପୂର୍ଣ୍ଣ କରି ଉଇକିପିଡ଼ିଆକୁ ସମୃଦ୍ଧ କରିପାରିବେ । |