ଚୁନି ଗୋସ୍ୱାମୀ

ସୁବିମଳ ଗୋସ୍ୱାମୀ (୧୫ ଜାନୁଆରୀ ୧୯୩୮ - ୩୦ ଅପ୍ରେଲ ୨୦୨୦), ଜଣେ ଭାରତୀୟ ଫୁଟବଳ ଖେଳାଳି ଥିଲେ । ଷ୍ଟ୍ରାଇକର ଭାବରେ ଖେଳି ସେ ନିଜ କ୍ଲବ ମୋହାନ ବାଗାନ ଓ ଭାରତୀୟ ଫୁଟବଳ ଦଳର ନେତୃତ୍ୱ ନେଇଥିଲେ । ସେ ଚୁନି ଗୋସ୍ୱାମୀ ନାମରେ ବେଶୀ ପରିଚିତ ଥିଲେ ।୩୦ଟି ଆନ୍ତର୍ଜାତୀୟ ଫୁଟବଲ ମ୍ୟାଚ ପଦାର୍ପଣରେ ସେ ୯ଟି ଗୋଲ ସ୍କୋର କରିଥିଲେ । ସେ ଭାରତ ତରଫରୁ ୧୯୬୦ ଅଲିମ୍ପିକରେ ଖେଳିଥିଲେ । ୧୯୬୨ ଏସୀୟ କ୍ରୀଡ଼ାରେ ତାଙ୍କ ନେତୃତ୍ୱରେ ଭାରତ ସ୍ୱର୍ଣ୍ଣପଦକ ହାସଲ କରିଥିଲା ଓ ୧୯୬୪ ଏସିଆନ କପରେ ଭାରତ ରନର୍ସ-ଅପ ହୋଇଥିଲା ।

ଚୁନି ଗୋସ୍ୱାମୀ
ଚୁନି ଗୋସ୍ୱାମୀ ୧୯୫୯ରେ
କଲିକତାର ସରିଫ
କାର୍ଯ୍ୟକାଳ ୨୦୦୫
ବ୍ୟକ୍ତିଗତ ସବିଶେଷ
ଜନ୍ମ	ସୁବିମଳ ଗୋସ୍ୱାମୀ (1938-01-15)୧୫ ଜାନୁଆରୀ ୧୯୩୮ କିଶୋରଗଞ୍ଜ, ବଙ୍ଗଳା ଗଡ଼ଜାତ,ସ୍ୱାଧୀନତା ପୂର୍ବ ଭାରତ (ବର୍ତ୍ତମାନ ବଙ୍ଗଳାଦେଶ)
ମୃତ୍ୟୁ	୩୦ ଅପ୍ରେଲ ୨୦୨୦(2020-04-30) (ବୟସ ୮୨) କଲିକତା, ପଶ୍ଚିମବଙ୍ଗ, ଭାରତ
ଜାତୀୟତା	ଭାରତ

ସେ କ୍ରିକେଟ ମଧ୍ୟ ଖେଳୁଥିଲେ ଓ ବଙ୍ଗଳା ଦଳ ତରଫରୁ ରଣଜୀ ଟ୍ରଫି ମଧ୍ୟ ଖେଳିଥିଲେ । ୧୯୭୧-୭୨ରେ ତାଙ୍କ ନେତୃତ୍ୱରେ ବଙ୍ଗଳା ଦଳ ରଣଜୀ ଟ୍ରଫି ଫାଇନାଲ ଖେଳିଥିଲେ ।

ଫୁଟବଲ ଖେଳାଳି ଭାବରେ

ଚୁନି, ନିଜର ସମ୍ପୂର୍ଣ୍ଣ କ୍ୟାରିୟର କେବଳ ମୋହନ ବାଗାନ କ୍ଲବ ତରଫରୁ ଖେଳିଥିଲେ ।

କ୍ଲବ ତରଫରୁ ଖେଳ

ସେ ମୋହନ ବାଗାନ ଜୁନିୟର ଦଳରେ ୧୯୪୬ ମସିହାରେ ୮ବର୍ଷ ବୟସରେ ଯୋଗ ଦେଇଥିଲେ । ୧୯୫୪ରେ ସେ ସିନିୟର ଦଳରୁ ଖେଳିବା ଆରମ୍ଭ କରିଥିଲେ ଓ ୧୯୬୮ରେ ନିଜର ଅବସର ପର୍ଯ୍ୟନ୍ତ ସେହି ଦଳ ତରଫରୁ ଖେଳୁଥିଲେ । ୧୯୬୦ରୁ ୧୯୬୪ ପର୍ଯ୍ୟନ୍ତ ସେ ମୋହନ ବାଗାନ ଦଳର ଅଧିନାୟକ ଥିଲେ ।

ଆନ୍ତର୍ଜାତୀୟ ଖେଳ

୧୯୫୬ରେ ଚୁନି ଭାରତ ତରଫରୁ ଖେଳିବା ଆରମ୍ଭ କରିଥିଲେ । ତାଙ୍କ ପ୍ରଥମ ମ୍ୟାଚରେ ଭାରତ ଚିନକୁ ୧-୦ ଗୋଲରେ ହରେଇଥିଲା । ସେ ଭାରତ ତରଫରୁ ୫୦ଟି ମ୍ୟାଚ ଖେଳିଥିଲେ । ସେଥି ମଧ୍ୟରେ ଅଲିମ୍ପିକ, ଏସୀୟ କ୍ରୀଡା, ଏସିଆ କପ, ମର୍ଡେକା କପ ଆଦି ଅନ୍ୟତମ ।୧୯୬୨ ଏସୀୟ କ୍ରୀଡାରେ ତାଙ୍କ ନେତୃତ୍ୱରେ ଭାରତ ସ୍ୱର୍ଣ୍ଣପଦକ ହାସଲ କରିଥିଲା ଓ ୧୯୬୪ ଏସିଆନ କପ ଓ ମର୍ଡେକା କପରେ ଭାରତ ରନର୍ସ-ଅପ ହୋଇଥିଲା ।

ଚୁନି ୩୦ଟି ଫିଫା 'ଏ' ଆନ୍ତର୍ଜାତୀୟ ମ୍ୟାଚ ଖେଳି ୯ଟି ଗୋଲ ଦେଇଥିଲେ ।

ଭାରତ ଜାତୀୟ ଦଳ
ବର୍ଷ	ପଦାର୍ପଣ	ଗୋଲ
୧୯୫୮	୫	୨
୧୯୫୯	୬	୧
୧୯୬୦	୩	୦
୧୯୬୧	୩	୦
୧୯୬୨	୫	୩
୧୯୬୪	୮	୩
ସମୁଦାୟ	୩୦	୯

କ୍ରିକେଟ ଖେଳାଳି ଭାବରେ

୧୯୬୨-୬୩ରେ ଚୁନି ବଙ୍ଗଳା ଦଳ ତରଫରୁ ରଣଜୀ ଟ୍ରଫି ଖେଳିବା ଆରମ୍ଭ କରିଥିଲେ । ସେ ଜଣେ ଡାହାଣ ହାତୀ ବ୍ୟାଟ୍ସମ୍ୟାନ ଓ ମିଡିୟମ ପେସ ବୋଲର ଥିଲେ । ଫୁଟବଲ ଖେଳର ଅବସର ନେବା ପରେ ସେ କ୍ରିକେଟ ଖେଳକୁ ପୂର୍ଣ୍ଣଭାବରେ ଆବୋରୀ ଥିଲେ ଓ ବଙ୍ଗଳା ଦଳ ତରଫରୁ ଖେଳିଥିଲେ । ସେ ଦୁଇଥର ରଣଜୀ ଫାଇନାଲ ଖେଳିଥିଲେ ଓ ଉଭୟ ଥର ବମ୍ବେଠାରୁ ପରାଜିତ ହୋଇଥିଲେ । ୧୯୬୮-୬୯ ରଣଜୀ ଫାଇନାଲରେ ସେ ପ୍ରଥମ ଇନିଙ୍ଗସରେ ୯୬ ଓ ଦ୍ୱିତୀୟରେ ୮୪ ରନ କରିଥିଲେ । କିନ୍ତୁ ଅଜିତ ୱାଡେକରଙ୍କ ଶତକ ବମ୍ବେ ଦଳକୁ ବିଜୟୀ କରାଇଥିଲା । ସେହି ବମ୍ବେ ଦଳରେ ଗାଭାସ୍କର ଓ ଶିଭଲକର ମଧ୍ୟ ଖେଳିଥିଲେ । ୧୯୬୬ରେ ପୂର୍ବ ଓ ମଧ୍ୟାଞ୍ଚଳର ଏକତ୍ର ଗୋଟିଏ ଦଳ ୱେଷ୍ଟ ଇଣ୍ଡିଜ ଗସ୍ତରେ ଯାଇ, ୱେଷ୍ଟ ଇଣ୍ଡିଜକୁ ତାଙ୍କରି ମାଟିରେ ଏକ ଇନିଙ୍ଗସରେ ପରାସ୍ତ କରିଥିଲେ । ଚୁନି ଏହି ମ୍ୟାଚରେ ୮ଟି ଉଇକେଟ ଅକ୍ତିଆର କରିଥିଲେ । ତାଙ୍କର ସମଗ୍ର ଫାଷ୍ଟ-କ୍ଲାସ କ୍ରିକେଟ ଜୀବନରେ ସେ ୪୬ଟି ମ୍ୟାଚ ଖେଳି ୧୫୯୨ ରନ ସ୍କୋର କରିଥିଲେ ଓ ୪୭ଟି ଉଇକେଟ ଅକ୍ତିଆର କରିଥିଲେ ।

ଅନ୍ୟ କାର୍ଯ୍ୟ

ଚୁନିଙ୍କର ବହୁବିଧ ବ୍ୟକ୍ତିତ୍ୱ ଥିଲା । ସେ ନିଜ କ୍ଲବ ତରଫରୁ ହକି ମଧ୍ୟ ଖେଳିଥିଲେ । ସେ ବଙ୍ଗଳା ଚଳଚ୍ଚିତ୍ର 'ପ୍ରଥମ ପ୍ରେମ'ରେ ଅଭିନୟ ମଧ୍ୟ କରିଥିଲେ । ୨୦୦୫ରେ କଲିକତା ମହାନଗରୀର ସେ ସରିଫ ହୋଇଥିଲେ । ସେ କଲିକତାର ସାଉଥ କ୍ଲବରେ ଲନ ଟେନିସ ମଧ୍ୟ ଖେଳୁଥିଲେ ।

ମୃତ୍ୟୁ

ଚୁନି, ୨୦୨୦ ମସିହା ଅପ୍ରେଲ ୩୦ତାରିଖରେ ହୃଦଘାତ ଯୋଗୁ ମୃତ୍ୟୁବରଣ କରିଥିଲେ ।

ସମ୍ମାନ ଓ ପୁରସ୍କାର

• ୧୯୬୨ ଶ୍ରେଷ୍ଠ ଷ୍ଟ୍ରାଇକର ପାଇଁ ଏସିଆ ପୁରସ୍କାର
• ୧୯୬୩ ଅର୍ଜୁନ ପୁରସ୍କାର
• ୧୯୮୩ ପଦ୍ମଶ୍ରୀ
• ୨୦୦୫ ମୋହନ ବାଗାନ ରତ୍ନ

ବାହାର ଆଧାର

• RSSSFରେ ଥିବା ତଥ୍ୟ